Madaxweynaha Dowladda Puntland Dr. Siciid Cabdullaahi Deni ayaa Maalmaha soo socda la filayo inuu isku shaandheyn balaaran ku sameeyo Agaasimayaasha Guud ee Wasaaradaha iyo Hay’adaha Madaxa-bannaan ee Dowladda Puntland.
Warar saacadihii ugu dambeeyay kusoo dhacayay Warqabadka Shabakadda Idil News, ayaa Sheegaya in Madaxweynuhu uu Agaasimayaal Guud iyo Agaasime-waaxeedyo uu Magacaabi doono qaar kamid ah Wasaaradaha iyo Hay’adaha Dowladda, sidoo kalena xilka laga qaadayo hore.
Madaxweyne Deni ayaa la sheegay inuu Agaasimayaal cusub uu u Magacaabi doono, Hay’addo ay kamid tahay Hay’adda Waddooyinka Puntland (PHA), taas oo muddooyinkii ugu dambeeyay aan shaqeyn.
Sidoo kale, Madaxweynaha ayaa la filayaa inuu Agaasimayaal Guud u Magacaabo Wakaaladaha Biyaha iyo Korontada, oo dhowaan Madaxweynuhu aas aasay, sidoo kalena Golaha Wasiiradu Meel-mariyeen.
Si Kastaba ha ahaatee, Is-bedelada Agaasimayaasha Guud ee Wasaaradaha iyo Hay’adaha Dowladda ee Madaxweyne Deni sameynayo, ayaa la filayaa inay xigto Isku shaandheyn uu ku sameynayo Golihiisa Wasiirada, kuwaas oo qeybtooda xilalkooda weyn doonaan.