Xaalad adag oo dhanka Nolasha ah,ayaa ka taagan Gobalka Doollo ee Ismaamulka Soomaalida Itoobiya, taas oo isugu jirta dhinacyada Arrimaha Bulshada, sida Caafimaadka, Biyaha, Waxbarashada iyo Horumarada dhanka dhaqaalaha.
Dadka kunool Degaanada Gobalka Doollo, ayaa bilaabay sanadihii ugu dambeeyay in ay isaga Barakacaan dhulkoodii, sidoo kalena ay hayaan dhanka Nolasha ah u soo galaan Degaanada Puntland-Somaliya, si ay uga helaan waxyaabaha aas aasiga u ah Nolasha aadamaha.
Dadkan,ayaa sidoo kale ka Barakacaya Cadaadis iyo handadaado joogta ah oo ay kala kulmayaan Ciidanka Itoobiya, gaar ahaan LIYUU POLICE, oo mararka qaar kula kaca falal xad-gudub ku ah Aadamaha.
Maamuladii kala danbeeyay ee soo maray Dowlad Degaanka Soomaalida,ayaa u muujiyay Dadka Gobalkaas degan in aysan ka laheyn wax Dan ah, iyadoona Maamulka Gobalka u soo magacaabayay Dad ay kusoo xusheen in ay Karti-yari iyo Maamul xumo, si ay ugu adeegaan Danahooda gaarka ah.
Madaxweynaha Dowlad Degaanka Soomaalida Mustafe Muxumed Cagjar,ayaa Guddoomiyaha Gobalka Doollo ka dhigay Cabdinaasir MH Cabdulle,
Halka Abdiqani Badal Khalaf uu ka dhigtay Gudoomiyaha Dagmada Bookh.
Kuwaas oo Bulshada Gobalka ay sheegeen in ay yihiin kuwo aan matali karin Masiirka Gobalka.
Madaxweyne Cagjar oo Gobalka Doollo yimid, ayaa dhagax-dhigay Mashaariic Hormarineed, halka kuwo kalena uu balanqaaday, mana jirto wax ka fulay Mashaariicdaas, waxaana ay dadka degaanku muujinayaan dareen niyad jab ah, kaas oo u muuqda inuu maalinba maalinta ka dambeysay inuu sii kordhayo.
Is-bedelaladii ka dhacay Degaanka Soomaalida,ayaan waxba u soo kordhin Gobalka Doollo, halka Gobalada kale ee baaxad ahaan iyo Bulsho ahaanba ka yar Gobalka ay heleen Mashaariic hormarineed oo laga fuliyay iyo Maamulo shaqeynaya, waxaana arintan loo sababaynaya Xukuumadda Dowlad Degaanka oo aan wax qiimeyn ah aan u heyn Gobalka Doollo iyo in la doonayo in la Barakiciyo Bulshada Gobalka Allah ku beeray.
Si kastaba ha ahaatee, Xaalada Bi’aadanimo ee ka taagan Gobalka Doollo,ayaa sababi karta in Mustaqbalka dhow ay xaalado adag ka dilaacaan Gobalka, sidoo kalena ay timaado in la xakameyn waayo Dhacdooyinka isa soo taraya ee Degaanka dul-hoganaya.