Ciidamo ka tirsan kuwa Millateriga Soomaaliya gaar ahaan qeybta 43aad oo ay wehlinayeen Ciidamada Daraawiishta Dowlad Goboleedka Jubbaland ayaa waxaa ay howlgal qorsheysan ka fuliyeen degaannada Taabta, Cabdalla Biroole & Kulbiyow ee Gobolka Jubbada Hoose.
Howlgalka ayaa Saraakiisha hoggaamineysay waxaa ay sheegeen uu ahaa mid looga saarayay deegaannada ay gobolka Jubbada Hoose kaga sugan yihiin Xubno ka tirsan Ururka Al-Shabaab,isla markaana ay guulo ka gaareen.
Taliyaha Ciidamada Daraawiishta Maamulka Jubbaland ee Aaga deegaanka Kulbiyow ayaa sheegay inay weerareen Fariisin ay ku sugnaayeen Xubno ka tirsan Al-Shabaab oo ku kala yaalla duleedyada deegaannada Kulbiyow iyo Cabda-biroole,isla markaana ay khasaaro ku gaarsiiyeen.
Dhinaca kale dagaal u dhaxeeyay Ciidamada Jubbaland & Al-Shabaab waxaa uu ka dhacay degaanka Cabadalla-Biroole ee Gobolka Jubbada Hoose,waxaana Saraakiisha Ciidamada Jubaland ay sheegeen inay la wareegeen Goobo ay ku sugnaayeen Al-Shabaab,sidoo kalena ay ku qabsadeen saanad Ciidan.
Deegaano iyo degmooyin ka tirsan gobolka Jubbada Hoose ayaa waxaa mararka qaar ka dhaca weeraro ay Al-Shabaab ku qaadaan saldhigyada ay Ciidamada Dowladda iyo kuwa AMIOSM ku leeyihiin halkaasi,waxaana Saraakiisha Ciidamada ay sheegaan inay iska difaacaan.