Garowe, April 24, 2024: Masuuliyiinta Wasaaradda Arrimaha Gudaha, Federaalka iyo Dimuqraadiyeynta Dowladda Puntland oo uu hogaaminayo Wasiirka Wasaaradda Arrimaha Gudaha, Federaalka iyo Dimuqraadiyeynta Dowladda Puntland Mudane Abdi Farah Juxa ayna Weheliyaan Wasiir Ku-xigeennadii Mudane Cabdiraxmaan Khaliif Faarax (Khaliifa), Wasiiru-Dowlaha Mudane Yuusuf Maxamed Wacays (Dhedo), Agaasimaha Guud ee Wasaaradda Mudane Mohamed AIi Farah Farmayeri iyo Xoghayaha Wasaaradda Abshir Xasan Maxamed ayaa kulan la qaatay Xisbiyada Siyaasadda Puntland.
Kulankaan oo ujeedkiisu ahaa is-waydaarsi iyo wadatashi la xiriira Arrimaha Dimuqraadiyeynta Dowladda Puntland, ayaa waxaa diiradda lagu saaray ka wada shaqaynta Doorashooyinka 3-Da Degmo ee Garowe, Godobjiraan iyo Dangarayo iyo dhamaystirka Fariisinta Goleyaasha Deegaanka Degmooyinka Dhiman ee kala ah Jariiban, Bursaalax, Murcanyo iyo Xumbays.
Intii shirku socday waxaa la is dhaafsaday dood wax ku ool ah oo u dhaxaysay madaxdii kala duwanayd ee shirka ka soo qaybgashay, taas oo daaranayd muhiimadda ay leedahay in isku bog laga ahaado dhammaan Arrimaha hortabinta u leh Geedi-socodka Dimuqraadiyeynta Dowladda Puntland.
Masuuliyiintii matalayey Xisbiyada Siyaasadda Puntland ee shirka ka soo qaybgalay ayaa soo jeediyey doorkooda ku aadan geedi socodka Dimuqraadiyeynta Puntland iyo meelaha u baahan in si guud looga wada shaqeeyo si loo yareeyo khilaafaadka iyada oo la dabakhayo casharadii laga bartay Doorashadii iyo Fariisinta 33-dii Degmo ee laga qabtay barnaamijka hal qof iyo hal Cod.
Wasiirka Wasaaradda Arrimaha Gudaha Mudane Cabdi Faarax Siciid Juxa oo shirka soo xiray ayaa hoosta ka xariiqay soo jeedintii iyo taladii Xisbiyada Siyaasadda ee ku aadanaa geedi socodka dhamaystirka Doorashooyinka Goleyaasha Deegaanka Puntland, waxa uuna masuuliyiinta Xisbiyada kula dardarmaay in si wada jira looga wada shaqeeyo arrimaha Doorashooyinka si loo dhamaystitro himiladii iyo balantii lalagalay shacabka Reer Puntland.
Xisbiyada Siyaasadda ee shirka ka soo qaybgalay ayaa kala ahaa Xisbiga Mustaqbal, Xisbiga Mideeye, Xisbiga Sincad, Xisbiga Runcad, Xisbiga Ifiye iyo Xisbiga Shaqaalaha.