Taliska ciidamada Daraawiishta Puntland ayaa ku jira diyaargarowgii ugu dambeeyay ee la xiriira duullaan culus oo ka dhan ah kooxaha argagixisada ah ee Al-Shabaab iyo Daacish.
Duullaanka ayaa wajigiisa kowaad lagu beegsan doonaa kooxda argagixisada ah ee Daacish, ee ku dhuumaleysanaya qeybo kamid buuraleyda calmiskaad ee gobalka Bari.
Daacish ayaa sanadihii lasoo dhaafay qoranaysay dagaalyahano ajaanib ah, iyadoo loo arko halis sii kordhaysa oo gabaad ka dhiganaysa buuraleyda Bari ee Puntland.
Kumanaan kamid ah ciidamada Difaaca Puntland ayaa hadda lagu daabulaya gobalka Bari, waxaana la filayaa in si rasmi ah uu ugu dhawaaqo dhowaan Madaxweynaha Puntland, Siciid Cabdullaahi Deni oo ku sugan gobalka Bari – bilaabashada howlgalkan.
Hoggaamiyaha Daacish ee Puntland, Cabdulqaadir Muumin ayaa loo badinayaa in bilo kahor loo doortay hoggaamiyaha sare ee Daacish, waxaana tani ay soo dadajisay in Puntland ay qaado howlgalkii ugu weynaa ee ka dhan ah kooxdan, si loo burburiyo unugyada ay ku dhisayso buuraha Bari, meesha looga saaro halista kasoo foogan.
IDILNEWS