Garoowe: 05 January 2025: Madaxweyne Ku-xigeenka Dowladda Puntland Mudane H.E Ilyas Osman Lugatoor, ayaa furay Shirka Tiknoolijiyadda Puntland oo ay soo diyaarisay Wasaaradda Warfaafinta Dowladda Puntland, ayna ka qeybgalayaan Hay’adaha ku shaqo leh arrimaha Tiknoolijiyadda, Warbaahinta, Shirkadaha Isgaarsiinta iyo Khuburo Aqoon u leh Tiknoolijiyadda .
Madaxweyne Ku-xigeenka Dowladda Puntland ayaa muujiyey muhiimada casrigan ay Tiknoolijiyadu u leedahay Dowladnimada , iyadoo nidaamka Dowladnimo ee Puntland ay qeyb weyn ka tahay, sida diiwaangelinta Ciidanka iyo Shaqaalaha, Ku maareynta maaliyadda, Adeegsiga adeegyada danabeysan, Isgaarsiinta, amniga, horumarka iyo qeybo badan oo Dowladnimada maanta ah.
Wuxuu Madaxweyne ku-xigeenku ku boggaadiyey Wasaaradda Warfaafinta joogtaynta Shirkan, oo sanadkiiba mar dib usoo Bandhigga Tiknoolijiyadda isbed-bedelaysa iyo siyaabaha ugu wanaagsan ee ay uga faa’ideysan karaan bulshooyinku, isaga oo booqday Adeegyada tiknoolijiyadda ee lagu soo bandhigay qeybta carwada ee munaasabadda .
Shirka Tiknoolijiyadda Puntland oo sanadkiiba mar la qabto, inta uu socdo waxaa lagu soo bandhigi doonaa, warbixino iyo doodo ku saabsan Tiknoolijiyadda heerka aan ka marayno iyo sida ugu wanaagsan ee looga faa’ideysan karo.
-DHAMMAAD-
