Nairobi, Kenya – March 2025
Shir ballaaran oo ka dhacay magaalada Nairobi ayaa waxaa kasoo qeyb galay qeybaha kala duwan ee beesha Cismaan Maxamuud, oo ay ku jiraan siyaasiyiin, ganacsato, aqoonyahanno, dhalinyaro iyo waxgarad kale. Shirkan oo lagu lafa-guray xaaladda siyaasadeed iyo horumarka Puntland ayaa si weyn loogu bogaadiyey dadaallada ay dowladdu wado, gaar ahaan dhammeystirka mashaariic muhiim ah oo horey u qabyo ahaa.
Qodobadii Shirku Ka Soo Baxay:
1. Taageerada Dowladda Puntland – Ka qeybgalayaashu waxay isku raaceen in la garab istaago dowladda Puntland, maadaama ay dadaal dheeraad ah ku bixisay dhammeystirka mashaariic muhiim ah sida dhismaha waddooyinka, dib-u-habaynta amniga, iyo horumarinta adeegyada bulshada.
2. Xoojinta Midnimada Beesha – Waxaa la isku raacay in beesha Cismaan Maxamuud ay doorkeedii ka qaadato horumarinta Puntland, iyadoo laga fogaado wax walba oo kala qeybin kara bulshada.
3. Maalgashiga iyo Horumarka Dhaqaalaha – Ganacsatada beesha ayaa lagu dhiirrigeliyay inay maal-gashi ku sameeyaan Puntland si loo kobciyo dhaqaalaha isla markaana loo abuuro fursado shaqo oo dheeraad ah.
4. Xiriirka Caalamiga ah iyo Wada-shaqeynta – Waxaa la isla qaatay in la xoojiyo xiriirka Puntland la leedahay wadamada iyo hay’adaha caalamiga ah si loo helo taageero dheeraad ah oo lagu horumarinayo kaabeyaasha dhaqaalaha iyo amniga.
5. Dhismaha Waddooyinka Buuraleyda Bari iyo Sanaag – Waxaa shirka si gaar ah diiradda loogu saaray muhiimadda ay leedahay in la dhammeystiro dhismaha waddooyinka gobollada buuraleyda ah, taasoo sare u qaadi karta isku xirnaanta Puntland iyo kobaca dhaqaale ee gobolka.
Shirkaan ayaa lagu soo gabagabeeyay jawi midnimo iyo wadajir ah, iyadoo dhammaan ka qeybgalayaashu ay isku raaceen in laga wada shaqeeyo horumarka Puntland iyo ilaalinta xasilloonideeda.
Dowladda Puntland ayaa la filayaa inay si dhow ula shaqeyso ganacsatada iyo aqoonyahannada beesha si loo dardar-geliyo mashaariicda horumarineed ee horey u socday.
Guul iyo Gobanimo.