Dowladda Puntland waxay dagaal adag kula jirtaa argagixisada caalamiga ah ee Daacish
Dowladda Puntland waxay si joogto ah ugu howlan tahay la dagaalanka kooxaha argagixisada ee khatarta ku haya amniga gobolka iyo guud ahaan dalka Soomaaliya. Waxaan caddeyneynaa in ciidamada ammaanka Puntland ay qabteen hub farabadan oo loo waday kooxaha Daacish ee ku dhuumaalaysanaya buuraha deegaanka Calmiskaad. Waxaa sidoo kale markale la qabtay shixnad hub ah oo si qarsoodi ah loogu waday argagixisada, taasoo muujinaysa feejignaanta iyo dadaalka joogtada ah ee ay dowladda Puntland ku ilaalinayso amniga shacabka.
Dowladda Puntland waxay si adag u cambaaraynaysaa cid kasta oo si toos ah ama dadban ugu lug leh taageeridda argagixisada. Waa mid aan la aqbali karin in dad Soomaaliyeed ay si qarsoodi ah u taageeraan cadowga shacabka, waxaana loo qaadi doonaa tallaabo sharci ah cid kasta oo lagu helo.
Waxaan sidoo kale shacabka Soomaaliyeed u caddeyneynaa in ay jiraan dad si ula kac ah ugu adeega danta argagixisada baraha bulshada, kuwaas oo faafinaya dacaayado iyo eedeymo been abuur ah si ay u marin habaabiyaan guulaha ay dowladdu ka gaartay la dagaalanka kooxahaas. Dadkani waxay ka xun yihiin guulaha dowladda Puntland iyo jabkii soo gaaray kooxaha argagixisada, taasoo caddayn u ah damiirkooda xun iyo doorkooda khaldan.
Ugu dambayn, waxaan u rajaynaynaa shacabka Soomaaliyeed guul, nabad, iyo midnimo. Waxaan sii xoojinaynaa dagaalka ka dhanka ah argagixisada ilaa laga cirib tiro gebi ahaanba.
WQ:-Cabdullaahi Salaad Wayrah.