Dowladda Puntland ayaa bixisay qeybtii labaad ee qoondadii lacageed ay ugu talagashay dhismaha Garoonka Kubadda cagta Cawaale Stadium ee Magaalada Gaalkacyo ee xarunta Gobalka Mudug.
Qoraal ay baahiyeen maanta Guddiga u qareemida Garoonka Kubadda cagta Cawaale ee Gaalkacyo ayay ku sheegeen inay soo gaartay Lacag dhan $91,000 oo dollar oo ah qeybtii labaad ee qoondada lacagta Dowladda Puntland ay ku dartay dhismaha Garoonka, taas oo dhameyd $190,000 oo dollar, uuna balanqaaday Madaxweynaha Dowladda Puntland Dr. Siciid C/llaahi Deni.
“Gudiga dhismaha Garoonka Cawaale Staidum, waxay Madaxwaynaha Dowlada Puntland Mudane: Said Abdulaahi Deni uga mahadcelinayaan bixinta qoondadii lacageed ee dhamaystirka Garoonka Cawaale. maanta taarikhdu tahay 27-0ct-2020, waxaa nasoo gaartay qaybtii labaad
$91,000″ ayaa lagu yiri qoraal ay baahiyeen Guddigu.
10 bishii August ee sanadkan, ayaa aheyd markii Qeybta 1-aad ee lacagtan lagu wareejiyay Guddiga dhismaha Garoonka Cawaale Stadium, oo haatan maraya meel gaba-gabo ah.
