Shukri Cabdiraxmaan oo muddo toban sano ah ka tirsanayd ciidamada Maraykanka, qaab qaxootinimo ahna ku tagtay dalkaas, ayaa doonaysa inay doorashada soo socota uga guulaysato xildhibaan Ilhan Cumar oo ka tirsan Congress-ka.
Waxay sheegtay inay ka tirsan tahay xisbiga mucaaradka ah ee Jamhuuriga, isla markaana ay wax badan ku dhaliilsan tahay siyaasadaha ay mudnaanta siisay Ilhaan, sida arrinta qaxootiga iyo xakameynta awoodda booliska.
“Ma hilmaami doono fursadaha uu Maraykanka i siiyay. Markii aan qaadanayay sharciga muwaadinnimada iyo markii aan ku biirayay ciidamada Maraykanka, waxaan ku dhaartay in aan difaaci doono, mana aha dhaar waqtigu ka dhaco,” ayay Shukri ku qortay barteeda Twitter.
Mar ay ka jawaabaysay dad su’aal ka keenay awoodda ay u leedahay inay doorashada soo socota uga guulaysato xildhibaan Ilhaan oo si weyn looga bartay Maraykanka iyo dibeddaba, ayaa waxa ay Shukri sheegtay inay ku dhex jirto bulshada, si tartiib ahna ay ugu guulaysan doonto kalsoonida cod bixiyayaasha.
Shukri waa hooyo haysata saddex carruur ah. Waxa ay sheegtay inay muddo afar sano ah ku noolayd xeryaha qaxootiga ee Kenya, ka hor inta aysan qoyskeedu tegin Maraykanka. Waxay ka soo dagaallantay Ciraaq, halkaas oo ay isku barteen nin askari ah, oo ay sheegtay in markii dambe uu u geeriyooday xanuunno maskaxda ah oo uu ka qaaday dagaalka.
Arrimaha ay sida weyn ugu ololeynayso waxaa kamid ah xakameynta qaxootiga sida sharci darrada ah ku gala Maraykanka.
“Xuduudaha dalkeenu hadda waa kuwo furan oo qofkii raba uu soo geli karo, mana jirto cid baarta dadka soo gala. Ma garan karto dhibaatada ay dadka soo galay noo geysan karaan,” ayay u sheegtay Fox News.
Shukri oo sheegtay inay tahay qof ku dhaqanta Diinta Islaamka ayaa ku dhaliishay Ilhaan inay doonayso in la dhimo awoodaha booliska Minneapolis, isla markaana laga jaro lacagaha ay dowladda siiso.
Askari ka tirsanaa booliska Minneapolis ayaa lagu helay dembi ah inuu jilibkiisa qoorta ka saaray, sidaana ku dilay nin madow ah oo lagu magacaabo George Floyd sanadkii 2020.
Ilhan waxay waxay markii koobaad ku guuleysatay kursiga gobolka Minnesota ee Congress-ka bishii November 2016, iyadoo noqotay mid ka mid ah labada hablood ee Muslimka ah ee ugu horreeyay abid ee loo doortay golahaas sharci dejinta.
Qoyskeeda ayaa markii hore yimid Mareykanka iyagoo qaxooti ah, waxayna noqotay haweeneydii ugu horreysay oo xildhibaan ka noqoto Congress-ka iyadoo xiran xijaab.
Ilhaan oo ka tirsan xisbiga Dimuqraadiga ayaa bishii November ee sanadkii tegay loo magacaabay ku xigeenka guddi hoosaadka awoodda u leh arrimaha Afrika iyo xuquuqul insaanka caalamka.
Waxa ay sidoo kale xulafo la tahay haween ka tirsan congress-ka oo aan aragtidooda la gabban, laguna naaneyso The Squad.
Shukri ayaa kamid noqotay dhowr qof oo dhawaan shaaciyay in Ilhaan ay kula tartami doonaan doorashada dhacaysa horraanta bisha November ee sanadkan.