Guddiga Canada u qaabilsan sii deynta maxaabiista ayaa dib u eegis ku samayn doona go’aan xabsiga looga sii daayay mid kamid ah ragga la tuhunsan yahay inay ka dambeeyeen weerarkii toorida loo adeegsaday ee ka dhacay gobolka Saskatchewan.
Warqadaha lagu sii daayay Myles Sanderson oo 32 jir ah ayaa muujinaya in horay uu u galay dembiyo, isla markaana 59 jeer ay maxkamado ku heleen dacwooyin loo jeediyay.
Waxaa xabsiga laga sii daayay bishii February isagoo gudanayay xukun afar sano ah.
“Waxaan rabaa inaan ogaado sababaha lagu saleeyay go’aanka lagu sii daayay ninkaas. Aad baan uga walaacsanahay waxa halkan ka dhacay,” ayuu yiri wasiirka badqabka dadweynaha Marco Mendicino.
Weerarka toorida loo adeegsaday oo dhacay Axadii ayaa waxaa ku dhintay 10 qof, halka 18 kale ay ku dhaawacmeen. Laamaha ammaanka ayaa ku raad-jooga Myles Sanderson.
Qaar kamid ah ehelada dadka la laayay oo warbaahinta la hadlay Arbacadii ayaa sheegay inay aad uga naxeen weerarkaas gilgilay shacabka Canada.
Maalmo kadib weerarkaas toorayda loo adeegsaday, shacabka Canada ayaa is weydiinaya su’aalo dhowr ah.
Ma cadda in Myles Sanderson uu keligii weerarkaas maleegay mise in cid kale ay ku gacan siisay. Booliska ayaa sheegay inay rumaysan yihiin in qaar kamid dadka la laayay ay ahaayeen bartilmaameed, balse ma aanay bixin faahfaahin dheeraad ah.
Farriin lagu diray telefoonnada gacanta ayaa Arbacadii u dhacday dadka ku nool magaalada Wakaw, iyagoo loogu baaqay inay ka dhuuntaan qof la sheegay inuu ku hubaysan yahay toori oo gaari ku wato deegaankaas.
Digniin noocaas ah oo maalin ka hor soo baxday ayaa noqotay mid been ah.
Warqadaha lagu sii daayay Myles Sanderson ayaa muujinaya in sanado badan uu ahaa dembiile, iyadoo yaraantiisa uu dhibaato badan kala kulmay waalidkiis.
Booliska Saskatoon ayaa sheegay in Myles Sanderson ay ku daba jireen tan iyo bishii May, markaas oo uu joojiyay la kulanka qof u xilsaarnaa kiiskiisa iyo dhaqancelintiisa. Waxa ay xilligaas ku tilmaameen nin sharciga ka baxsaday.
Waxaa sidoo kale la sheegay inuu marar hore oo la sii daayay uu maray barnaamijka dhaqan celinta dembiilayaasha, isla markaana uu muddo ahaa nin toosan oo shaqeysta.
Myles Sanderson ayaa hadda loo haystaa dacwad ah inuu geystay dilal badan.