Boqorka dalka Malaysia ayaa aqbalay in uu cafis u fidiyo hoggaamiyaha mucaaradka Malaysia Anwar Ibrahim kadib markii uu arrintaas soo jeediyay Ra’isulwasaaraha cusub ee dalkaas laga doortay Mahathir Maxamed.
Anwar Ibrahim oo ah nin loo arko in uu yahay hoggaamiye mustaqbal wanaagsan leh ayaa loo xirey dacwado la xiriira musuqmaasuq iyo waliba xad gudub xagga galmada ah.
Balse Mahathir Maxamed oo ahaa ninkii talada hayay markii Anwar dacwadda lagu soo oogayay ayaa hadda ku guuleystay doorashooyin dhacay, wuxuuna doonayaa in uu cafis u fidiyo.
Mahathir ayaa sheegay in uu talada Malaysia ku wareejin doono sanado kooban gudahood.
Isaga oo hadlayay maalin kadib doorashooyinkii taariikhiga ahaa ee dhacay, ayuu Mahathir sheegay in boqorka dalkaas uu ogolaaday in uu cafiyo Anwar.
Malaysia oo yeelatay hogaamihii ugu da’waynaa ee abid adduunka laga doorto
Baarlamaanka Malaysia oo la kala diray
Mahathir Mohamad oo mar kale u tartamaya rai’sul wasaaranimada Malaysia
Nin Xamaas ka tirsan oo lagu toogtay Malaysia
Xaaska Anwar Wan Azizah ayaa sheegtay in boqorka uu doonayo in ninkeeda lagu siidaayo maalmo gudahood.
Guusha Mahathir ayaa soo afjartay xukunkii halka xisbi ee mudada lixdanka sano ahayd.
Mahathir iyo Anwar ayaa horey u wada shaqeeyay, iyaga oo isu noqday Ra’isulwasaare iyo ku xigeenkiisa, ka hor intii aanan xilka laga eryin Anwar sanadkii 1998-dii, xilligaas oo kadib dacwadaha lagu soo oogey.
Anwar ayay maxkamad laashay xukunkii horey loogu ridey, balse markii uu doorashooyin ka qeybqaatay, loona filayay in uu guuleysto ayay maxkamad kale xukuntay in xabsiga lagu celiyo.
Wax kasta waxa ay is badaleen sanadkan horaantiisii kadib markii Mahathir Maxamed oo 92 jir ah uu ku dhawaaqay in uu doorashooyinka isu taagayo, isaga oo dhaleeceyn u jeediyay Ra’isulwasaarihii isaga xilka ka badalay ee Najiib Razak.
Mahathir ayaa markii uu mucaaradka ku biiriyay waxaa shuruud looga dhigay in uu cafis boqorka uga dalbo Anwar, shuruudaas oo uu aqbalay, iyada oo labo sano gudahood uu xilka ku wareejin doono Anwar.
Inkasta oo ay isbahaysi ku jiraan, haddane xisbiga cusub ee Mahathir ee Bersatu, ayaa baarlamaanka ku leh 13 kursi oo kaliya, wuxuuna aad uga yaryahay xisbiga Anwar oo baarlamaanka ku yeeshay 47 kursi.
Sidaasi darteed waxaa la sheegay in Mahathir uu balantiisa oofin doono.
XIGASHO BBC