Maraykanka ayaa markale dhigay rikoodh cusub, iyada oo ay sii kordhayso tirada dadka u dhinta isticmaalka xad-dhaafka ah ee dawooyinka iyo daroogada, waxaana sannadkii hore la diiwaangeliyey in ka badna 107,000 oo qof sida ay shaacisay xarunta Xakamaynta iyo ka hortagga cudurada ee dalka Maraykanku.
Tiradan la soo saaray ayaa ka badan 15% tiradii la diiwaangeliyey sannadkii hore ee 2020, waxaana taasi ay la macno tahay inay in ugu yaraan uu hal qof u dhinto 5-tii daqiiqoba, isticmaalka xad-dhaafka ah ee daawooyinka iyo daroogada.
Dhimashada xad-dhaafka ah ee daroogada iyo daawooyinka ee Maraykanka ayaa kor u socotay labaatankii sano ee u dambeeyey.
Dr. Rahul Gupta oo ah Agaasimaha Xafiiska Aqalka Cad ee Siyaasadda Qaran ee Xakamaynta Dawooyinka ayaa arrintan ku tilmaamay inay tahay mid aan la aqbali karin, isaga oo sheegay in intaraatejiyadda cusub ee madaxweyne Biden ee ku aaddan xakamaynta daawooyinku inay calaamad u tahay, in la dardargeliyo siyaasadda lagu xakamaynayo isticmaalka daroogada iyo dawooyinka sida xad-dhaafka ah loo isticmaalo, iyada oo xuddun looga dhigayo badbaadada shakhsiyaadka iyo bulshada.
Dr. Rahul Gupta ayaa yidhi “tallaabooyinkaas waxaa ka mid ah balaadhinta helitaanka qalabka yareeya ama hoos u dhiga, waxyeellada saamaynta sare leh, sida naloxone, iyo in si dhakhso ah dad badan loogu gudbiyo daawaynta, ka hortegidda iyo baabi’inta ka ganacsiga daroogada, iyo hagaajinta xogta iyo sida loo wadaagi karo” ayuu yidhi.