Taageerada Dhallinyarada Puntland ee Dowladda Madaxweynaha Puntland Mudane Siciid Cabdullaahi Deni
Anaga oo ah dhallinyarada reer Puntland, kana dambeeya Jamaahiirta Difaaca iyo Dimuqraadiyadda Puntland, waxaan si cad oo aan gabasho lahayn u caddeyneynaa in mar walba aan garab iyo gaashaan u nahay Dowladda Puntland ee uu hoggaamiyo Madaxweynaha Puntland Mudane Siciid Cabdullaahi Deni. Taageeradayada waan muujiyey horay, maanta iyo berri dambena diyaar ayaan u nahay in aan mar walba garab istaagno dowladda iyo hoggaankeeda wanaagsan.
Anagoo ah dhallinyaro aqoon leh, wax ku soo bartay gudaha dalka iyo dibaddaba, weli waxaan sugaynaa fursadihii iyo kaalintii ay dhallinyarada Puntland xaqa u lahaayeen in ay ka qaataan horumarka iyo dhismaha dalkooda. Waxaan kalsooni buuxda ku qabnaa in Madaxweynaha Puntland uu yahay hoggaamiye si buuxda u garwaaqsan muhiimadda dhallinyarada, isla markaana og in dhallinyaradu yihiin laf-dhabarta horumarka iyo horusocodka ummadda.
Mudane Madaxweyne, mar kale waxaan ku xusuusinaynaa in aad fursad muuqata siisaan dhallinyarada aqoonta leh ee ku sugan gudaha dalka, si ay door muuqda uga qaataan horumarinta Puntland, difaaca dalkooda, iyo xoojinta dowladnimada.
Waxaan ognahay in dhallinyarada Puntland ay yihiin cududda ugu weyn ee dalka iyo shacabka. Sidaas darteed, waxaan mar kale codsaneynaa in loo abuuro fursado shaqo oo dhab ah iyo nolol sharaf leh oo ay ku dhistaan mustaqbalkooda kuna adeegaan dalkooda.
Dhanka kale, waxaan ugu baaqeynaa dhallinyarada Puntland in ay ilaashadaan nabadda, midnimada, iyo horumarka Puntland. Waxaan sidoo kale farriin cad u diraynaa: Joojiya tahriibka! Nolol wanaagsan waxaa laga helaa dalkiinna, tahriibkuna wuxuu keenaa kaliya burbur iyo hoog. Ilaashada naftiinna, dalkiinna, iyo dadkiinna.
Jamaahiirta Difaaca iyo Dimuqraadiyadda Puntland maaha urur maanta un dhacay, balse waxay ahaayeen hormuudkii u istaagay hirgelinta dimuqraadiyadda dhabta ah ee Puntland. Waxay ahaayeen dhallinyaradii ugu horreysay ee abaabushay xafladaha lagu taageerayo ciidamada difaaca Puntland, waxayna hormuud ka ahaayeen abaabul walba oo sare loogu qaadayo niyadda iyo dhiirigelinta ciidamada.
Waxay sidoo kale taageero toos ah siiyeen guddigii uu magacaabay Madaxweynaha Puntland Mudane Siciid Cabdullaahi Deni, guddigaas oo qaabilsanaa isku dubaridka taageerada iyo u qareemidda ciidamada. Taageeradooda kuma ekaan gudaha kaliya, waxay sidoo kale si xoog leh uga hadleen warbaahinta, iyagoo dhiirrigelinaya ciidamada una caddeynaya shacabka xaqnimada dagaalka ay ku jiraan.
Waxaa intaas dheer, Jamaahiirta Difaaca iyo Dimuqraadiyaddu waxay ahaayeen kuwii ugu horreeyay ee dadweynaha u cadeeyay in dagaalka lagula jiro kooxaha Khawaarijta iyo Daacish uu yahay dagaal xaq ah oo lagu difaacayo diinta iyo dalka. Iyaga kadib ayaa culumadii kale ee dalka si rasmi ah u caddeeyeen mowqifkooda oo ay taageereen ciidamada geesiyaasha ah ee Puntland.
Jamaahiirta Difaaca iyo Dimuqraadiyaddu waa dallad ballaaran oo xiriir dhow la leh dowladda, waxayna ka kooban yihiin dad aqoon durugsan leh, isla markaana si hagar la’aan ah ugu shaqeynaya danaha shacabka Puntland iyo dowladnimadooda.
Ugu dambayn, waxaan Ilaahay ka baryaynaa in uu guul waarta siiyo Dowladda Puntland, gaar ahaan dagaalka ay kula jirto kooxaha Khawaarijta ah ee cadowga ku ah diinta iyo dalkaba. Waxaan halkan uga diraynaa salaan sharaf iyo bogaadin ciidamada Puntland ee guulaha waaweyn ka keenay wajiyadii hore ee dagaalka. Waxaan Ilaahay ka baryaynaa in uu naxariisto shuhadada ciidamada, dhaawacyadana bogsiin degdeg ah siiyo. Guushu way dhow dahay Insha’Allaah.
Waxaa soo saaray:
Dhalintarada Difaaca iyo Dimuqraadiyadda Puntland
15 Juun 2025