Madaxweynaha DFS, Xassan Shiikh Maxamuud ayaa iclaamiyay qabashada gogasha Wadatashiga Qaran, taas oo uu ku casuumay xubno uu ugu yeeray siyaasiyiin iyo hoggaamiyayaasha Bulshada.
Gogasha oo ka qabsoomi doonta 15 June magaaladda Muqdisho – ayuu sheegay in looga hadli doono siddeed qodob, kuwaas oo kala ah Amniga, ciribtirka argagixisada, dimuqraadiyadda. doorashooyinka, dhameystirka dastuurka, midnimada iyo dib-u-heshiisiinta.
Sababta keentay iclaaminta gogasha.
Habeeno kahor, Madaxweyne Xassan Shiikh ayaa ka ballanqaaday wakiillada Beesha Caalamka, in uu qaban doono gogol ballaaran oo ay qeyb ka yihiin dhammaan madaxda Dowladdaha xubnaha ka ah DFS iyo siyaasiyiinta mucaaradka ah, taas oo looga hadlayo xaalka siyaasadeed ee Soomaaliya, gaar ahaan marxalada kala-guurka ah iyo doorashooyinka soo wajahan.
Ballanqaadka oo yimid, kaddib hanjabaad toos ah oo loo diray Xassan Shiikh iyo in laga fara maroojin doono tallada – ayaa hadda u muuqda mid aan dhameystirneen, maadama aan lagu muujin casuumadda Xassan ka timid cidda loo qeybta ka ah gogasha.
Siyaasiyiinta mucaaradka ah oo ay ugu waa weyn yihiin Madaxweynayaashii hore iyo Ra’iisul Wasaarayaal hore – ayaa qeyb ka noqon doonin shirka, oo uu u muuqda mid la sii hayay xogtiisa, taas oo guuldarro weyn iyo dharbaaxo siyaasadeed ku noqon doonta Xassan Shiikh.
Waraaqda uu soo tuuray Madaxweyne Xassan ayaa loo arka mid uu kaga dhuumanayo indhaha Beesha Caalamka, isaga yareynayo cadaadiska saaran, balse dadka ku foogan xaalka siyaasadeed ee Soomaaliya iyo dhaqdhaqaaqyada dublamaasiyiinta shisheeye ayaa sheegaya in Madaxweynuhu luminayo maalmo muhiim u ah waayihiisa siyaasadeed iyo xukunkiisa, ayna suuragal tahay in wakiillada caalamiga ah ka tashtaan qorshayaasha Xassan, ayna ku dhaqaaqaan jihooyinka u diyaarsan, oo ay ugu weyn yihiin qabashada shir wadatashi oo Xalane ka dhaca, iyo go’aanka la geeyo meel ka baxsan Soomaaliya.
IDILNEWS