Xildhibaano ka mid noqonaya Golaha Shacabka ee baarlamanka 11-aad ee Soomaaliya ayaa maanta lagu doortay magaalada Muqdisho.
Doorashada maanta oo ka dhacday dugsiga tababarka Janeraal Kaahiye ayaa waxaa lagu doortay illaa shan xubnood oo baarlamanka kasoo galaya gobollada waqooyi (Somaliland).
Xubnaha la doortay ayaa waxaa ka mid ah Maxamed Cabdi Maareeyee oo markii labaad lasoo doortay, isaga oo ka guuleystay musharrax Cabdiraxmaan Warsame Saciid.
Waxaa sidoo dib loo soo doortay xildhibaan Aamino Cumar Jaamac kadib markii ay tanaasushay Aamino Cismaan Diiriye oo la tartameysay.
Sidoo kale Faadumo Xasan Cali ayaa iyana la doortay kadib markii sida la sheegay loo tanaasulay.
Maxamed Haaruun Cabayaa isna doorashadiisa uga adkaaday Axmed Cali Maxamed oo la tartamay.
Xubnaha maanta la doortay ayaa ku biiraya laba kursi oo horey loo doortay, oo iyagana golaha shacabka kasoo galay dhanka Somaliland.