Safiirrada Qaramada Midoobay iyo Mareykanka ayaa qodobo adag hordhigay Madaxweyne Xassan Shiikh Maxamuud, oo kulan qaatay saacado badan ay kula yeesheen xerada Xallane, gelinkii dambe ee isniintii.
Kulanka oo qabsoomay wax yar kaddib markii uu soo dhammaaday kulan u dhexeeyay Wakiillada caalamiga ah, gaar ahaan bahda C6+ – ayaa diirrada lagu saaray baahida loo qabo in la badbaadiyo hannaanka dowlad-dhiska Soomaaliya ee heshiiska laga yahay.
Danjire Swan iyo safiirka Mareykanka Richard Riley, ayaa u soo bandhigay Madaxweyne Xassan Shiikh labo qodob, kuwaas oo kala ah
1. In uu aqbalo shuruudaha mucaaradka (Madasha Samatabixinta Soomaaliyeed), uuna ka shaqeeyo in gogasha uu iclaamiyay 15 bishan June noqoto mid loo dhan yahay, oo leh ajande cad, heshiisna looga gaaro qodobada la isku hayo, sidda laallida Dastuurka oo uu ka laabto iyo heshiis laga gaaro doorashada dalka ee 2026.
2. In uu ku dhagnaado mowqifkiisa, ayna fashilanto gogasha 15 June, ayna iyagu si rasmi ah u soo galaan arrimaha Soomaalida, heshiis siyaasadeed oo dalka samatabixiyana laga doono meel ka baxsan Soomaaliya, sida KAMPALA.
Xassan Shiikh oo la daalaa-dhacaya culeysyada siyaasadeed ee ka dhashay tallooyinkiisii ayaa ay heysata labo daran mid dooro, iyadoo dadka la socda xaaladiisa ay qabaan in ay u badan tahay heshiiska Soomaalida laga doono caasimadda dalka Uganda ee Kampala.
IDILNEWS