Madaxweynaha Puntland, Siciid Cabdulaahi Deni ayaa galabta dib ugu soo laabtay caasimadda Puntland ee Garoowe, kaddib 41 maalmood oo uu ku maqnaa dalalka Kenya, Imaaraatka Carabta iyo Itoobiya.
Siciid Deni oo ay wehlinayaan xubno ku dhow oo dowladdiisa ah, ayaa kasoo amba-baxay caasimadda dalka Itoobiya oo kulamo kula yeeshay xubno sare oo katirsan Dowladda Itoobiya.
𝐃𝐞𝐧𝐢 𝐢𝐲𝐨 𝐥𝐚𝐛𝐨 𝐓𝐚𝐥𝐚𝐚𝐛𝐨 𝐨𝐨 𝐥𝐚𝐠𝐚 𝐬𝐮𝐠𝐚𝐲𝐨.
Xukuumadda Madaxweyne Deni ayaa wajahaysa niyad jab ay qabaan badi bulshada deegaanka Puntland, taas oo ka dhalatay hoos u dhac ku yimid shaqooyinka hay’addaha dowladda, kaas oo dhashay xubnaha Dowladda ee jooga xafiisyada iyo duruufaha dhaqaale ee lasoo gudboonaaday shaqaalaha rayidka ah ee ka shaqeeya xafiisyada Wasaaraddaha iyo Hay’addaha kale, kuwaas oo sanadkan aan helin mushaaraad, marka laga soo tago labo bilood.
Shacabka Puntland ayaa naawilaya in Madaxweyne Deni uu isbedel degdeg ah ku sameeyo Agaasimayaasha Guud iyo qaar kamid ah Wasiirada maamulkiisa, si ugu yaraan dhiig cusub loogu shubo shaqada Dowladda, loona helo xubno firfircoon oo dhaqaajiya shaqooyinka istaagay.
Sidoo kale, bulshada ayaa ka filaysa Madaxweyne Deni in degdeg loo xalayo xaalada dhaqaale ee shaqaalaha, lana joogteeyo mushaaraad iyo xuquuqad kale ee Dowladda, si loo hagaajiyo hanaanka shaqo ee xafiisyada, waxna isaga bedelaan dhaqdhaqaaqda suuqa, maadama mushaar la,aantoodu saameysay nolasha bulshada.
IDILNEWS