Dowladda Uganda ayaa sheegtay in ay u yeertay in ka badan 1,000-Askari oo howlgab ah si ay ugu soo dirto Soomaaliya uguna biiraan ciidamada Ururka Midowga Afrika gaar ahaan kuwa difaaca dalkeeda ka socda.
Askarkaan lasoo dirayo ayaa ah qaybta 31-aad ee Ciidamada Difaaca Uganda UPDF oo la qorsheeyay in Soomaaliya loosoo diro bishii April 2020 balse waxaa baajiyay faafitaanka xannuunka Covid-19 sida warka lagu yiri.
Maj Yuusuf Bilaal Katamba oo kamid ah Saraakiishii ugu horreysya ee Ciidamada AMISOM Soomaaliya la keenay sanadkii 2007-dii ayaa sheegay in ciidankaan bilaha soo socda dib loogu celinayo Soomaaliya.
Askarkaan howlgabka ah ayaa Soomaaliya yimid sanadkii 2007-dii oo ah markii uu bilawday howlgalka Midowga Afirkia ee AMISOM, waxaana xiligaas Dalka ka socday Dagaal u dhaxeeyay Ciidamadii Dowladdii KMG ahayd oo garab ka heleysa Askarta Itoobiya & kooxihii wax iska caabbinta ee Maxkamadaha ka farcamay.
“Qorshaha Askartaan lagu geynayo Soomaaliya ayaa ahaa Bishii April 2020 balse waxaa xayiray xaalada Covid-19 oo marqura dalalka Caalamka si kale u rogtay, Waa koox waayo aragnimo u leh Soomaaliya oo ay kasoo shaqeeyeen, waxa ay xoojinayaan askarta kale ee Afrika” Sidaasi waxaa yiri Sarkaal katirsan Ciidanka Howlgabka ah ee Soomaaliya loosoo wado.
Soomaaliya waxaa ku sugan ku dhawaad 20,000 Askari oo xiran astaanka Midowga Afrika, waxaana ay ka kala socdaan dalal kala duwan oo qaaradda dhacda, 25-kii Febaraayo 2021 ayaa loo kordhiyay muddo shaqeedkooda kadib markii Golaha Ammaanka uu ansixiyay soo jeedintaas.
Ciidanka Uganda ee Soomaaliya ku sugan waxaa lagu qiyaasaa in ay ka badan yihiin 6,000 oo askari, ilaa saddex qayb ayay u joogaan, kuwa ayaa ku jira liiska Militariga AMISOM, Booliis ahaan askar ayaa u diiwaangashan halka qaybta saddexaad ay ilaalo ka tahay xarumaha Qaramada midoobay ee Soomaaliya.