Madaxweynaha Puntland, Siciid Cabdulaahi Deni ayaa maalmaha soo socda safar degdeg ah ku tagi doona magaalada Badhan ee gobolka Sanaag.
IdilNewa ayaa heshay, in Madaxweyne Deni oo hadda ku sugan magaalada Dekedda leh ee Garacad ee gobolka Mudug – uu berri safar diyaaradeed ku gaari doono magaalada Boosaaso, halkaas oo ku qaabili doono Wafuud kala duwan.
Madaxweyne Deni ayaa horraanta asbuuca soo socda uga gudbi doona deegaanada gobolka Sanaag, waxaana uu tagi doonaa Badhan, isagoo xariga ka jari doona waddada Ceeldaahir iyo Badhan oo ay dhistay Dowladda Puntland.
Sidoo kale, Madaxweynaha ayaa Tababar u soo xiri doono in kabadan Kun Askari oo cusub oo kamid ah ciidamada Daraawiishta Dowladda Puntland.
Dhanka kale, Siciid Deni ayaa kulamo la yeelan doona maamulka gobolka, kan degmada, iyo qeybaha kala duwan ee bulshada, waxaana uu halkaa kaga dhawaaqi doonaa mashaariic horumarineed oo cusub oo gobolka Sanaag laga hirgelin doono.
IDILNEWS