Ra’iisulwasaaraha Xukuumadda Federaalka Soomaaliya Xasan Cali Kheyre, ayaa shalay is hor-taagay dhaqaale gaaraya 112 Milyan oo dollar-ka Mareykanka ah, kaas oo uu ugu deeqay Bangiga adduunku in lagu hormariyo 4 Magaalo oo kamid ah kuwa ugu waa weyn Soomaaliya, kuwaas oo kala ah Muqdisho, Garoowe, Kismaayo iyo Baydhabo.
Ra’iisulwasaare Kheyre ayaa u sababeeyay is hor-taaga Lacagtan oo magaalo walba helayso 28 Milyan oo dollar, in aysan ku jirin Magaalooyinka Dhuusa-mareeb iyo Jowhar ee Maamulada Hirshabelle iyo Galmudug, kuwaas oo beel ahaan uu ku abtirsado Ra’iisulwasaare Kheyre, sidoo kalena Madaxdoodu ku xiran yihiin Xafiiskiisa.
Hadaba Maxaad ka og-tahay Lacagtan ?
Bangiga Adduunka ayaa lacagtan shaaciyay “9-kii bishii Decembar ee sanadkii tagay ee 2019”, iyadoona Bangigu uu sheegay in Lacagtan loo ansixiyay hormarinta 4 Magaalo, oo saddex kamid ah ay xurumo u yihiin Dowladda Puntland, Jubbaland iyo Koonfur Galbeed.
Qoraal kazoo baxay Bangiga adduunka waqtigaas, ayaa lagu yiri “Bangiga adduunka ayaa manta (9-12-2019), ansixiyay deeq lacageen oo dhan $ 112 Milyan oo dollar, taas oo loogu tala-galay kaabayaasha dhaqaale ee ahmiyadda u leh Magaalooyinka Soomaaliya, laguna xoojinayo awooda Dowladaha Hoose”
Bangiga adduunka ayaa intaas ku daray “Mashruuca SUPR 2 ee Magaalooyinka Soomaaliya wuxuu sahli doonaa maal-gashiga kaabayaasha dhaqaalaha ee magaalooyinka istiraatiijiga ah, sida Muqdisho, Garoowe, Kismaayo iyo Baydhaba, Iyadoo sidoo la dhigayo aasaaskii ballaarinta Mashruucaan, Magaalo madaxda Galmudug iyo Hirshabelle waxay iyana bilaabanayaan wajiga kowaad ee mashruucan, halka magaalooyinka kor ku xusan ay marayaan wajigii labaad ee Mashuuraca”.