Beesha Caalamka ayaa soo dhaweysay heshiis ay dhowaan magaalada Nairobi ee xarunta Dalka Kenya ku gaareen Madaxweynaha Dowladda Jubbaland Mudane Axmed Maxamed Islaam iyo Golaha Is-bedel doonka Jubbaland, kuwaas oo ku kala Irdhoobay Doorashadii bishii August ee sanadkii tagay ee 2019.
War-saxaafadeed kasoo baxay Xubnaha Beesha Caalamka ayaa lagu sheegay in heshiiska ay wada-gaareen Madaxweynaha Jubbaland iyo mucaaradkiisii ay horseedayso in la soo afjaro kala qeyb-sanaantii ka dhalatay Doorashadii Jubbaland, waxaana ay intaas ku dareen in loo baahan yahay in dhinacyadu ay sii wadaan dhaqan-gelinta heshiiskii 20-April lagu gaaray Nairobi.
Sidoo Kale, Beesha Caalamka ayaa bogaadisay aragtida Hoggaanka Jubbaland ee aheyd in miiska wada-hadalka lagu dhameeyo khilaafkii ka dhex jiray Jubbaland iyo inay diyaar u yihiin wada-hadal ay la galaan Madaxda Dowladda Federaalka Soomaaliya.
Ugu dambeyntii, Beesha Caalamka ayaa sheegtay inay diyaar u tahay dadaalada lagu soo gaba-gabeynayo khilaafyada ka dhex jira Dowladda Federaalka iyo Dowladaha xubnaha ka ah DFS, iyadoona sidoo kale soo dhaweysay soo afjaridii khilaafkii ka dhashay Doorashadii Maamulada Galmudug iyo Koonfur Galbeed.