Caluula, 21 Luulyo 2025 – Ciidanka Booliska Puntland, gaar ahaan Taliska Qeybta Gobolka Raas-Caseyr, ayaa fuliyay howlgal amni oo lagu baaray markab laga shakiyay oo kusoo xirtay xeebta Degmada Bareeda. Markabkaasi ayaa si buuxda loo baaray, waxaana la xaqiijiyey in uusan wadin wax sharci-darro ah, taasoo keentay in si nabad ah loo fasaxo.
Sidoo kale, Ciidanka Booliska waxay xaqiijinayaan in dhowaan la qabtay markab kale oo lagu helay hub sharci-darro ah. Markabkaasi wuxuu si buuxda ugu jiraa gacanta laamaha amniga, waxaana socda baaritaan rasmi ah oo qoto dheer. Ilaa baaritaanku soo dhammaado, faahfaahin dheeraad ah lagama bixin karo.
Taliyaha Booliska Gobolka Raas-Caseyr, G/sare Mahad Cali Carcar, ayaa shacabka uga digay in ay iska ilaaliyaan wararka been-abuurka ah ee ay faafinayaan kooxo dano gaar ah leh. “Waxaa jira dad raba inay burcad abuur sameeyaan oo dadka badda u diraan, marka waa in aan si wadajir ah uga hortagnaa,” ayuu yiri Taliyuhu.
Ciidanka Booliska Puntland ayaa sidoo kale wada hawlgallo joogto ah oo lagu xaqiijinayo amniga xeebaha Puntland oo dhan, si looga hortago dhaqdhaqaaqyada sharci-darrada ah sida tahriibka, ka ganacsiga hubka, iyo suurtagalnimada in kooxaha argagixisada ah – gaar ahaan kooxda Daacish – ay helaan marin u suura geliya taageero ama ku baxsadaan xeebaha.
Booliska Puntland wuxuu hoosta ka xariiqayaa in aysan marnaba ogolaan doonin in xeebaha Puntland loo adeegsado ujeeddooyin khatar gelinaya amniga qaranka, ayna diyaar u yihiin wax kasta oo looga hortagayo falalka lidka ku ah nabadda iyo xasilloonida guud ee gobolka iyo caalamka.
— DHAMMAAD —