Madaxweynaha Somaliland, Cabdiraxmaan Cirro ayaa ku qaabilay Madaxtooyada Hargeysa siyaasiyad Fahiima Yuusuf Quuje, oo kamid ah haldoorka Sool Bari, dhowaana dib ugu laabatay caasimadda Somaliland ee Hargeysa, kaddib markii ay ka quusatay maamulka uu Xassan Shiikh ka sameeyay Laascaanood.
Madaxweyne Cirro ayaa uga mahadceliyay Fahiima Quuje ku soo noqoshada Somaliland.
“Madaxweynaha Somaliland waxa uu si gaar ah ugu mahad naqay Siyaasiyad Fahiima Yusuf Quuje, isaga oo uga mahad naqay ku soo noqoshada dalkeeda iyo sida ay ugu soo hiratay ciiddeeda iyo calankeeda, taasoo wax ka tari karta gogosha nabadda iyo walaalaynta bulshada Somaliland ee bariga Gobolka Sool” ayaa lagu yiri qoraal uu baahiyay Madaxtooyada Somaliland.
Cirro ayaa sheegay in tan iyo markii loo dhaariyay hoggaaminta Somaliland, uu ka shaqeeynayay ilaalinta nabadda, xasilloonida iyo walaalaynta shacabka Somaliland, min bari ilaa galbeed, isaga oo carrabka ku adkeeyey in wixii khilaaf iyo xurguf ah ee jira lagu xalliyo wada-hadal, is-afgarad iyo walaalnimo waarta.
IDILNEWS