Madaxweynaha DFS, Xassan Shiikh Maxamuud,ayaa sheegay in uu diyaar u yahay wadahadal uu la galo madaxda Jubbaland iyo Puntland, si uu uga qanciyo khilaafka kala dhexeeya, ugalana dooddo qorshihiisa doorashada qof iyo codka ah, taas oo aan la ogeyn halka ay ka dhacayso.
Xassan Shiikh oo casho sharaf u sameeyay xalay, qaar kamid ah xildhibaanada labada aqal ee BJFS, ayaa si la yaab leh uga hadlay damaciisa ku wajahan dalka, iyo burburinta hannaan dowladeed ee Soomaalidu ku heshiisay.
Marnaba sooma hadal qaadin diidmadiisa gogasha Garoowe, ee uu fidiyay Madaxweynaha Puntland, Siciid Cabdullaahi Deni intii lagu guda jiray munaasabaddi caleema-saarka Deni ee bishii January 2024.
Maalmo kahor xubno aqoonyahano ah oo iskood isku xilqaamay, kulana kulmay Garoowe Madaxweyne Deni, si loo dhameeyo khilaafka DFS iyo Puntland ayaa ku eedeeyay Xassan in uu ka xirtay albaabada, xilli intii ay joogeen caasimadda Puntland uu u wakiishay u kala dab qaadista isaga iyo Deni.
Baaqa wadahadallada Xassan Shiikh,ayaa loo arkaa mid uu ku jahwareerinayo shacabka Soomaaliyeed iyo safiirada Beesha Caalamka oo cadaadis ku saarayay todobaadyadii u dambeeyay in uu joojiyo isku daygiisa ku wajahan burburinta dalka iyo kala daadinta nidaamka dowladeed ee Soomaalida.