Gabadh Qaayo Weyn
Gabadh qaayo weynoo
Geenyo ugub la moodoo
Garashiyo aqoon iyo
Gobannimo u dhalatoo
Qurux Guulle siiyoo
Xishood lagu galladayoo
Reerkoodu gaan yahay
Oomasoore guban iyo
Gaajiyo harraad arag.
Geesiyaal walaalo ah
Garbaheeda joogaan,
Gardarrada ma qaatee
Haddii uu dagaal galo
Aabbaheedna gaas iyo
Soo kiciyo geesh adag.
Sidii waxaan la gooyn karin
Geel iyo gammaan faras
Gawaarida is-jiidiyo
Dahab loogu ardaa galo
Giiryaale fuley iyo
Gaandhadiyo ragaaskuna
Isha inuu ku gaadoo
Guudka sare ka eegtiyo
Gaaggaatan mooyee
Xeradaba aan soo gelin.
Gablantooy adduunyada
Waa guri belaayoo
Dagaal lagu gumaadmiyo
Cudur aan la garanayn
’Gam!’ ka siiyey gacalkeed
Aakhira u guureen.
Iyadoo garayskii
Ku giirgiirmay oogada
Garbasaarta sare iyo
Go’na aanan lagu arag
Maxaa Guufan-guufaa
Markay gaankaa marayso
Indhuhuun gembiyi jirey,
Giirka iska kiciyoo
Hadba garab istaagoo;
”Ma ku guursadaa?” yidhi,
”Mise gaabsigaa roon?”
Afku intuu jawaab gabay
Ilmaduna ka gabax tidhi,
Geesta isu buustoo
Soo gocotay waa hore;
”Allow muu guyaal tegey
Garaadkii i dhalay iyo
Gayfane adeerkey
Iyo gobannimadoodii
Ama gaarhayoo nool
Afka ila soo galo,
Maxaa geeso dhiig liyo
Gawsahoo la jebiyiyo
Gaagtira ka dhici laa.”
Cabdinaasir Biixi Soofe