Maalmihii ugu dambeeyay waxaa baraha bulshada lagu faafiyay inuu socdo mooshin ka dhan ah Madaxweynaha Dowladda Puntland Dr. Siciid C/llaahi Deni, kaas oo ay dabada ka riixayaan mid kamid ah Musharixiintii sida weyn ay ugu loolameen Doorashadii 8-Janaayo ka dhacday Garoowe iyo Xukuumadda Federaalka Soomaaliya.
Shabakadda Idil News, oo wadday muddooyinkii ugu dambeeyay baaris ku aadan wararkaas ayaa la xariirtay dhinacyada Madaxtooyadda iyo Gen. Asad Cismaan Diyaano oo ah shaqsiga la sheegay inuu waddo olalaha ka dhanka ah Madaxweyne Deni.
Gen. Asad Cismaan ayaa been abuur ku tilmaamay warar lala dhex-marayo Baraha Bulshada iyo Sawirada la faafiyay ee lagu sheegay inuu ku sugan yahay Magaalada Muqdisho.
โWaan arkayay warar aan salka iyo raadka laheyn ee lagu faafinayo baraha bulshada Madaxweynahana waxaa uu ku yimid Guul Doorasho, mana ihi ruux lagu tuhmi karro in Puntland Dowladnimadeeda uu dhaawacayo, sidoo kalena waa sawirro hore kuwa lagu faafinayo baraha Bulshada anna waxaan ku sugnahay degaankaโ ayuu yiri Gen. Asad Diyaano.
Madaxtooyadda Puntland oo aan wax ka weydiinay wararka lala dhex marayo baraha bulshada, ayaa sheegtay in aysan jirin wax dareen ah oo ku aadan olalaha la sheegay inuu ka dhan yahay Madaxweynaha, waxaana ay carabka ku adkeysay in wararkaas ay yihiin kuwo riyo ah, lana doonayo in Bulshada lagu jahwareeriyo, lagana soo waariday dhanka Muqdisho.
Si kastaba ha ahaatee, Wararkan been abuurka ah ee lagu baahiyay Baraha Bulshada ayaa abuuray suโaalo badan, kuwaas oo ay ugu horeeyaan sababta ka dambeyn karta in Baarlamaanka Puntland uu Mooshin ka keeno Madaxweyne Deni ?, maadama Guulo wax ku ool ah ay gaartay Xukuumadiisu mudada 9 bilood ah ee ay jirtay, sida Tayaynta iyo Tirakoobka Ciidanka, Dardar-gelinta Hormarinta kabayaasha dhaqaalaha, Qabashada Shirkii Maal-gashiga Puntland, Xaqiijinta amniga Boosaaso, soo dabista iyo ka hir-gelinta Hanaanka Dowliga ah Degaanada Gobalka Sanaag.