Garoowe, Nofeembar 20, 2024: Wasiirka Wasaaradda Waxbarashada iyo Tacliinta Sare ee Puntland Mudane Fu’aad Abshir Axmed oo ay wehlinayeen Wasiir Ku-xigeenka Wasaaradda, Wasiiru Dowlaha, Agaasimaha Guud, Agaasimeyaasha Waaxyaha iyo khubarada Wasaaradda ayaa warbixin u jeediyey Guddoonka iyo Xubnaha Golaha Wakiillada Puntland.
Madaxda Wasaaradda ayaa si faahfaahsan u soo bandhigay qorshahay horumarineed ee waxbarashada, caqabadaha jira iyo guulaha laga gaaray taabbo gelinta mideynta waxbarashada, manaahijta iyo daadejinta adeegyada waxbarashada heer gobol iyo heer degmo.
Xildhibaannada Golaha Wakiillada Puntlnad ayaa su’aalo ka weydiiyay Madaxda Wasaaradda tayeynta manhajka waxbarashada, kor u qaadidda tayada dugsiyada hoose iyo dhexe, hirgelinta barnaamijka quudinta ardayda, maamulka deeqaha waxbarashada iyo xeerarka muhiimka ah ee la xiriira tayada waxbarashada Puntland
Kulankan oo ka tirsanaa Kalfadhiga 55-aad ee Golaha Wakiillada Dawladda Puntland ayaa waxaa guddoominayey Guddoomiyaha Golaha Wakiillada Puntland Mudane Cabdirisaaq Axmed Siciid oo uu wehlinayo Guddoomiye ku-xigeenka 2-aad Mudane Maxamed Maxamuud Ciise.
– DHAMMAAD –