Garoowe : 22 November 2025: Ku-simaha Madaxweynaha, ahna Madaxweyne Ku-xigeenka Dowladda Puntland H.E Ilyaas Cismaan Lugatoor,ayaa maanta Shir-Guddoomiyey kulan looga hadlayay xal u helida Bacaadka ku fidaya deegaannada xeebaha ah ee Puntland .
Wasaaradda Deegaanka oo kulanka soo qaban qaabisay,ayaa soo bandhigtay daraasaad dhammaystiran oo lagu sameeyey faafitaanka bacaadka ee ka jira Puntland, gaar ahaan deegaannada gobolka Mudug, kuwaas oo qaar ka mid ah uu saamayn xooggan ku yeeshay.
Madaxweyne Ku-xigeenka,ayaa tilmaamay in dowladdu ay ahmiyad gaar ah siin doonto ka hortagga iyo Xakamaynta bacaadka kusii faafaya gobolada Puntland, wuxuu sheegay in la samayn doono guddi heer sare ah oo si buuxda ugu hawlgalaya sidii loo samayn lahaa qorshe cad oo looga hortagayo fiditaanka bacaadka. Guddiga ayaa noqon doona mid isku xira hay’adaha dowladda, khubarada deegaanka iyo bulshada deegaanka, si loo helo xal waara.
Kulanka waxaa soo qaban-qaabisay Wasaaradda Deegaanka iyo Isbadalka Cimilada Puntland, waxaana ka qaybgalay Wasiirka Deegaanka, Wasiiru-Dowlaha Madaxtooyada, Wasiirka Xanaanada Xoolaha, Xildhibaanno ka tirsan Golaha Wakiillada, iyo masuuliyiin kale oo ka socday hay’adaha dowladda.
— DHAMMAAD —