Aad ayay u calaamad wanaagsan tahay in maanta qurbajoogta Puntland ay hantidooda iyo aqoontooda dib uga maalgashanayaan dalkooda ammaan ee Puntland. Hirgelinta xaafadda casriga ah ee Istanbul, oo ku dhow Garoonka Diyaaradaha ee Gen. Maxamed Abshir, waa tusaale buuxa oo muujinaya kalsoonida iyo nalka horumarineed ee ka shidantay caasimadda Garoowe.
Dib-u-soo-gurya-noqoshada qoysaska intaa le’eg waxay dalka u keenaysaa aqoon, ilbaxnimo iyo koboc dhaqaale. Si kasta oo ay udhiirran yihiin maalgashadayaashan, guusha buuxda waxay ku xiran tahay is-garabsiga maamulka iyo muwaadinka.
Tallaabooyinka Garab-staagga ee Maamulka Dowladda Hoose:
- Booqasho & Dhiirrigelin: In maamulka degmadu uu booqashooyin joogto ah ku tago xaafadda Istanbul si loo dareensiiyo maalgashadayaasha in dadaalkooda la qiimeynayo.
- Fududeynta Adeegyada: In la baahiyo adeegyada aasaasiga ah (sida jidadka, layrarka, iyo amni-dhowrka) si ay qurbajoogtu si dhaqso ah ulla qabsadaan nidaamka dalka.
- Iskaashiga Bulshada: In la abuuro madal wada-hadal oo u dhexaysa maamulka iyo guddiga xaafadda Istanbul si loo xalliyo caqabadaha taagan.
Sidaas darteed, dhiirrigelinta maalgashiga noocan ah oo keliya maaha caawinaad loo fidinayo qurbajoogta, waa tallaabo toos u dhisaysa mustaqbalka iyo bilicda caasimadeenna Garoowe, waana Horumarka la hiigsanayo.
Hassan Cubeyd
Guul iyo Gobonimo
Mahadsanidiin.