Sucuudiga,ayaa Axaddii ku dhawaaqay in ay magcaabeen Danjirihii ugu horreeyey ee ay u dirayaan dalka Siiriya, ka dib markii ay 12 sano ka hor xidhiidhka u jareen Dalka Siiriya.
Tallaabadan,ayaa noqonaysa mid muujinaysa xidhiidhka soo hagaagaya ee labada dhinac, tan iyo wixii ka dambeeyey markii Siiriya dib loogu ogolaaday ka qaybgalka shirarka ururka Jaamacadda Carabta.
Faisal al-Mujfel, ayaa noqonaya danjirhii ugu horreeyey ee ka socda dalka Sucuudiga muddo 12 sannadood ah, sida lagu baahiyey wakaaladda wararka ee dalka Sucuudiga.
Sannadkii hore ayaa dawladda Siiriya dib loogu ogolaaday ururka Jaamacadda carabta ka dib markii xubinimada dalkaas la hakiyey sannadkii 2011, iyada oo laga falcelinayo, gacantii adkayd ee uu maamulka Siiriya kula macaamilay debedbaxayaashii ka soo horjeedsaday xukunkiisa. Sannadkii xigay ee 2012, ayay ahayd markii labada dal ay kala qaateen Safaaradaha.