Sidda ay ogaatay IdilNews, Xildhibaanada Baarlamaanka Dowladda Puntland ayaa wadda qorshe ay doonayaan in ay xasaanada kaga qaadaan Wasiiro katirsan xukuumadda Madaxweyne Siciid Cabdulaahi Deni.
Wasiirada ay doonayaan in Xildhibaanada Baarlamaanka Puntland ay xasaanada ka qaadaan ayaa waxaa kamid ah Wasiirka Caafimaadka Puntland, Maxamed Faroole, Wasiirka Waxbarashada Puntland, Fu’aad Adeer, Wasiirka Maaliyadda Puntland, Maxamed Faarax iyo xubno kale oo katirsan Xukuumadda Deni.
Wararka ayaa sheegaya in Wasiirada qaarkood looga yeeri doono kulamada Kalfadhiga 59aad ee furmay 25 bishan October, iyadoo su’aalo laga weydiin doono dhacdooyin ka taagan Wasaaraddahooda, iyadoo intaa kaddib xildhibaanadu cod gelin doonaan ridistooda.
Xogaha ayaa intaa ku daraya in qorshaha xasaanad ka xayuubinta ay waddo Madaxtooyada Puntland, ayna suuragal tahay in xildhibaanadu si aqlabiyad leh u ridaan Xukuumadda Madaxweyne Deni.
Madaxweyne Deni ayaa aad uga walaacsan isku shaandheyn uu doonayo in uu ku sameeyo Golihiisa Wasiirada, isagoo cabsi ka qaba in ku keento culeys siyaasadeed, wallow saaxiibada ku dhow Madaxweynaha ay soo tabinayaan doonistiisa ku wajahan in qaar kamid ah Wasiiradiisa uu ka saaro dowladdiisa, maadama uu arko in ay ka shaqeeynayaan siyaasaddo ka dhan ah iyo olale doorasho oo ku wajahan musharraxnimadooda 2029.
IDILNEWS