Banaan bax looga soo horjeedo Wasiirka Arrimaha Gudaha Hirshabeelle iyo Xariga Agaasimaha Isbitaalka Intersos ayaa saaka ka socda magaalada Jowhar, iyadoo dadweyne careysan ay taayaro ku gubeen agagaarka xarunta maamulka Hirshabelle.
Banaan baxan ayaa ka dambeeyay, kaddib amar ka soo baxay Wasiirka Arrimaha Gudaha, kaasoo ahaa in laga guuro Isbitaalka Jowhar ee ay gacanta ku heyso Hey’adda Intersos, si dhismaha uu xafiisyo ugu noqdo Wasiirada tirada badan ee Hirshabeelle, kuwaasoo aan heysan xafiis iyo deegaan midna.
Qaar ka mid ah dadweynihii isugu soo baxay ayaa sheegay inay ka soo horjeedaan Tallaabada Wasiirka uu qaaday iyo xariga Agaasimaha Isbitaalka Jowhar Xasan Mahad.
Dadweynaha ayaa ku qeylinayay erayo ka dhan ah Wasiirka Arrimaha Gudaha Hirshabeelle, iyagoo sheegaya in aanu ka war heyn xaalada gobolka iyo marxalada ay ku sugan yihiin dadka ku nool Shabeellaha Dhexe.
Qeybaha kala duwan ee Bulshada ayaa wax lala yaabo ku tilmaamay amarka Wasiirka ee uu ku aadan in laga guuro Isbitaalka kaliya ee adeega caafimaad u haaya dadka ku nool Gobolka, isla markaana Wasiirka aanu waxba kala socon xaalada gobolka, labaatankii sano ee la soo dhaafay dibad joog ahaa.
Ma jirto wax war ah oo ka soo baxay Madaxweynaha iyo Madaxweyne kuxigeenka Hirshabeelle, iyadoo tallaabadan uu qaaday Wasiirka Arrimaha gudaha ay suura gelin karto in dadka reer Jowhar ay kalsoonida kala laabtaan Maamulka, maadaama markii hore ay dadweynaha cabasho ka qabeen in dadkii la yaqiin ee reer jowharka ahaa aan loo soo magacaabin xilalka Wasiirada, isla markaana dadka ugu badan ee Wasiirada laga dhigay ay yihiin kuwo meelo ka baxsan Gobolka ka yimid, oo qabiil ahaan xilal ku helay,hoos ka daawo muuqaalka.
Halkan ka daawo muuqaalka
