Xildhibaan Cabdullaahi Maxamed Nuur,ayaa sheegay in abaarihii 5:10 galabnimo xilli uu marayay Bar kayntarool ay Ciidamada NISA ku lahaayeen agagaarka Saldhiga Bari ee degmada C/casiis ay rasaaseeyeen Gaari uu saarnaa.
“Maanta marki ay saacadu ahayd 5:10pm ama galabnimo waxaa si bareer rasaas iigu furay Ciidamada NISA xilli aan marayay meel checkpoint ah kadib marki ay gaarigayga istaajiyeen ina weydiiyeen aqoonsi waana la wadaagay, kaddib waxaa ay nagu wargeliyeen in aanu socon karno, balse markii aan soo dhaafay 20 Mitir waxaa igu soo bilaabay rasaas isla askarigi i fasaxay iyo qaar kale oo la joogay sidoo kale waxaa uu amray gaari nuuca ciidamada oo qori weyn saaran yahay in uu i rasaaseeyo, waxaa xilligaas gaariga ila saarnaa hal askari oo kaliya, weerarkaas qaawan waxaa uu ahaa mid qorshaysan waana allah mahadiis waa nabad qabaa”ayuu yiri Xildhibaan C/llaahi Maxamed Nuur.
Sidoo kale Xildhibaanka ayaa sheegay in dhowr jeer oo hore inuu hanjabaado kala kulmay Ciidanka NISA, isla markaaba khatartaas amni uu la wadaagay Guddoomiyaha Golaha Shacabka Maxamed Mursal.
“Waxaan rabaa in aan la wadaago shacabka Soomaaliyeed in ciidama NISA iga soo gaaray Marar badan handadaado amni, markii ugu dambeysay ee ay isoo gaartay khatartaas amni waxaan la wadaagay Guddoomiyaha Golaha shacabka Amb. Mohamed Mursal, waxaana dalbanayaa in baaritaan madaxbanaan lagu sameeyo wixi dhacay maanta”ayuu yiri Guddoomiyaha Kutlada Horusocod ee mucaaradka ah.
Wararka ayaa intaa ku daraya in Ciidamo ka tirsan Ilaalada Xildhibaanka oo goobta soo gaaray uu is hor imaad kooban ay dhex martay ciidakii NISA, waxaana markii dambe xaalada soo farageliyay Saraakiil xiisada goobta ka jirtay xaliyay.