Madaxweyne Tayyib Erdogan ayaa Sabtida maanta ugu hanjabay warbaahinta Turkey in ay aargoosi la kulmi doonaan haddii ay faafiyaan warar dhaawacaya qiyamka asaasiga ah ee Turkey, tallaabadaasi oo ay suurtagal tahay in ay horudhac u tahay faafreeb dheeri ah oo ay warbaahintu wajahaan.
Qoraal uu daabacay wargeyska rasmiga ah ee Gazette ayuu ku sheegay in loo baahan yahay tallaabooyin lagu ilaalinayo “dhaqanka qaran” ee Turkey, islamarkaana laga hortago in ubadku ay ku barbaaraan “in ay si xun u saameyaan warbixinnada waxyeellada leh ee dhammaan warbaahinta qoraalka, tan maqalka iyo tan muuqaalkaba.”
Erdogan ayaan carrabaabin waxa ay yihiin warbixinnadaasi, laakin waxa uu tilmaamay in tallaabo sharciga waafaqsan laga qaadi doono “ficillada la ogyahay ama kuwa qarsoon ee loo adeegsado warbaahinta kuwaasi oo looga dan leeyahay in lagu waxyeeleeyo qiyamka qarankeena iyo akhlaaqdeena, laguna khalkhalgeliyo hab dhismeedka qoysaskeenna iyo bulshadeena.”
Turkiga ayaa sanadihii ugu dambeeyay u dhaqaaqay in uu kordhiyo xakameynta warbaahinta, iyadoo ku dhawaad 90% warbaahinta waaweyn ee dalkaasi ay hadda leedahay dowladda ama ay lee yihiin shakhsiyaad ku dhow dowladda.
Xulafadeeda reer galbeedka iyo kuwa dhaleeceeya ayaa sheegay in Erdogan uu u isticmaalayay afgambigii dhicisoobay ee 2016-kii, si uu u aamusiyo kuwa isaga ka soo horjeeda, meeshana uga saaro xuquuqda bulshada.
Dawladda ayaa beenisay dhaleeceyntaasi, waxayna sheegtay in tallaabooyinka la qaaday ay yihiin kuwo lagama maarmaan ah oo ay keentay hanjabaadaha uu Turkigu wajahayao, waxayna sheegtay in ay dib u soo celisay xorriyadda diinta ee jamhruuiyaddan mar ahaan jirtay dowlad cilmaani ah.
REUTERS