Dowladda Uganda ayaa si rasmi ah u shaacisay inay bilowday qorshaha ay ciidamadeeda kaga soo saarayso Soomaaliya, kuwaas oo dalka ku joogay heshiis laba geesood ah oo kala dhexeeya Dowladda Federaalka Soomaaliya.
Sida lagu sheegay war-saxaafadeed uu soo saaray afhayeenka ciidamada difaaca Uganda (UPDF), Chris Magezi, ciidamada Uganda ayaa durba bilaabay ka bixitaanka Soomaaliya, iyadoo cutubkii ugu horreeyay ee ciidamada lagu celiyey dalkooda.
War-saxaafadeedka ayaa lagu sheegay in howlgalka ciidamada lagala baxayo uu si degdeg ah u dhaqan galay, isla markaana inta ka dhiman qorshaha ka bixitaanka ciidamada ku jooga heshiiska labada dowladood la dhammaystiri doono maalmaha soo socda.
Sidoo kale, War-saxafadeedka ayaa lagu sheegay in Uganda ay qorshaynayso inay ciidamadeeda oo dhan kala baxdo Soomaaliya dhammaadka sannadka 2027.
Tallaabadan ayaa soo afjari doonta joogitaanka milatari ee muddada dheer ee Uganda ku lahayd Soomaaliya, kaas oo soo socday ku dhowaad 20 sano.
IDILNEWS