Dowladda Puntland ayaa hirgelisay cutub cusub oo kamid ah Ciidanka Difaaca Dowladda Puntland, kuwaas oo ku howlgalli doona diyaaradaha aan duuliyaha lahayn ee Drones-ka.
Diyaaradaha Drones-ka ah ee Ciidanka ku shaqeyn doonaan ayaa ka kooban saddex nooc, oo kala Drones-ka loo adeegsado Sahanka, kuwa is qarxiya iyo Drones-ka geysta duqeymaha meelaha durugsan.
Cutubkan Ciidanka ah ayaa dhismihiisu soo billowday intii lagu guda jiray Howlgalka Hillaac ee Ciidanka Difaaca Puntland ku qaadeen kooxda argagixisada ah ee Daacish, kuwaas oo dhul ballaaran laga sifeeyay, lagana dilay in kabadan 1,500 oo kamid ahaa maleeshiyaadka Daacish, oo ay ku jireen xubno sarre.
Bilo kahor, Dowladda Imaaraatka Carabta ayaa ugu deeqday Puntland taageerada xoojinta dhismaha cutubka, waxaana mid kamid ah dalalka gobolka iyo dalka Imaaraatka la geeyay qeybtii ugu horreysay ciidamada loo tababarayo adeegsiga iyo ku dagaallanka diyaaradaha Drones-ka ah.
IdilNews ayaa ogaatay in xubnaha la kaxeeyay oo gaaraya ilaa 40 dhallinyaro ah, uu Imaaraatku bixin doono mushaaraadkooda, ayna yeelan doonaan xarun u gaar ah oo ku talla garoonka diyaaradaha Boosaaso, oo hadda ay yaalaan Drones-ka Puntland keensatay, iyadoo xoguhu intaa ku darayaan in cutubkaan la hoos geyn doono Taliska Ciidanka PMPF Dowladda Puntland.
In Dowladda Puntland ay si rasmi ah u howlgalliso cutubka ciidanka ah ee ku howlgalli doona noocyada kala duwan ee diyaaradaha Drones-ka ah, ayaa ka dhigan u diyaargarow dagaal iyo isku qalabeynta Tiknoolajiyada casriga ah, maadama dunidu gashay xaalad hubanti la,aan ah ayna Puntland ku jirto dagaal argagixiso oo caalami ah.
IDILNEWS