Kumaad Rumeeysanaysaa?
Waxaa kadinka deyrka Wadaad Nasruddiin yimid nin ay jaar ahaayeen. Dibedda ayuu ugu soo baxay oo ninkii la kulmay.
“Wax miyaad, Shiikhow, ka qabi lahayd,” jaarkii ayaa weyddiiyey, “in aad maanta dameerkaaga i amaahiso? Degmada inagu dhow ayaan alaabo yar ku geeysan lahaa.”
Hayeeshee, Wadaadku arrinta sinnaba uguma jajabnayn, gaar ahaan in uu neefkiisa ninkan amaahiyo. Haddaba, si aanu ugu anshax-xumaannin ayuu ku yidhi:
“Waan ka xumahay, horey baan nin kale u amaahiyey.”
Durbadiiba dameerkii ayaa dambeedka gidaarka deyrka guriga ci’ dheer oo la wada maqli karo ku dhuftay.
“Hase ahaatee, Shiikhow,” jaarkii ayaa afka furtay, “cidiisa ayaan dambeedka gidaarka ka maqlayaa!”
“Kumaad rumeeysanaysaa,” Wadaadkii ayaa isagoo ciishaysan ku warceliyey, “ma dameerka mise Shiikhaaga?”
Sheekooyinka Nasruddiin Xoja [noolaa qarnigii 13aad ee miillaadiga]