Baarlamaanka Puntland ayaa ku guda jira kulamo xasaasi ah oo kamid ah Kalfadhiga 55aad ee Golaha, kuwaas oo looga yeeray qaar kamid ah Wasaaraddaha Xukuumadda Puntland ee uu hoggaamiyo Madaxweyne Siciid Cabdullaahi Deni, si loogula xisaabtamo shaqooyinka ay u hayaan shacabka Puntland.
Masuuliyiinta Wasaaraddaha Amniga, Arrimaha Gudaha, Maaliyadda, Qorsheynta iyo Waxbarashada Puntland ayaa hortagay xildhibaanada Golaha Wakiillada Puntland, waxaana su’aalo muhiim ah laga waydiiyay adeegga bulsho ee ay bixiyaan. Wasiirada qaar ayaa la hordhigay caqabado ka jira shaqadooda iyo adeegyada Wasaaraddaha ay hayaan iyo musuqmaasuq lagu eedeeyay.
Sabtida maanta ah, Masuuliyiinta Wasaaradda Caafimaadka Puntland ayaa hortagaya, waxaana si weyn isha loogu hayaa la-xisaabtanka hoggaanka wasaaraddan oo ah mid kamid ah Wasaaraddaha ugu muhiimsan ee Puntland, maamushana mashaariicda ballaaran oo la xiriira adeeg bixinta Dowladda.
La-xisaabtanka Wasaaraddaha ee ay wadaan xildhibaanada Puntland ayaa ah mid si weyn loogu amaanay Golaha Wakiillada, shacabka ku sugan gudaha deegaanada Puntland iyo dibedda ayaana si weyn ula socda.
IDILNEWS