Kooxda argagixisada ah ee Al-Shabaab ayaa dagaal kula wareegay degmada Aadan Yabbaal ee gobalka Shabeellaha dhexe, taas oo muddooyinkii u dambeeyay ay gacan ku heynteeda ku fara adeegaysay DFS.
Al-Shabaab ayaa subaxnimadii hore ee saaka, weerar dhowr jiho ah kuna bilowday qaraxyo ku qaaday saldhigyo ciidamada Dowladda Federaalka ah ku lahaayeen Aadan Yabbaal – waxaana dagaal saacado socday kaddib isaga baxay degmada ciidamada Xoogga dalka, taas oo suuragalisay in argagixisadu si buuxda ula wareegto.
Sawirro iyo muuqaallo ay baahisay kooxda Al-Shabaab – ayaa muujinaya maleeshiyaadka kooxda oo dhexmaraya degmada Aadan Yabbaal, oo kamid deegaanada istiraatiijiga ah uuna dhowaan booqday Madaxweyne Xassan Shiikh.
Xilliga weerarku dhacayay, waxaa Aaddan Yabbaal ku sugnaa saraakiil sare oo uu hoggaaminayo Taliyaha Ciidamada Xoogga dalka iyo Guddoomiyaha Maxkamadda Ciidamada qalabka sida ee DFS, kuwaas oo dhowaanahan abaabulayay guluf weyn oo dagaal, oo ka dhan ah Al-Shabaab.
Qabashashadeeda ayaa uga dhigan Villa Somalia guuldarro weyn, iyo fashil dhanka Amniga ah.