Howlgalka ciribtirka argagixisada ee Daacish ayaa maraya meel wanaagsan, iyadoo ciidamada Difaaca Puntland ay ku guda jiraan diyaargarowgii u dambeeyay ee soo afmeeriida firxadka argagixisada.
Ciidamada ayaa maalmaha soo socda qaadi doona howlgal cir iyo dhul ah, kaas oo lagu beegsanayo goobo lagu tuhunsan yahay in ay ku sugan yihiin saraakiil iyo maleeshiyaad katirsan Daacish oo ajaanib iyo Soomaali ah.
Wafti ka socda Dowladda Puntland, uuna hoggaaminayay Guddoomiye kuxigeenka Gollaha Wakiillada Puntland ayaa sabtidii gaaray furimaha hore ee dagaalka, iyagoo kulan la yeeshay saraakiisha hoggaaminaysa howlgalka oo uga warbixiyay diyaargarowgooda iyo natiijada howlgalladii la sameeyay maalmihii lasoo dhaafay.
Waddo cusub oo loo diyaariyay isticmaalka ciidamada Puntland, tagaysana aagga Miraale ayaa gabagabo ku dhow, waxaana bilowday in gaadiidka ciidamadu adeegsadaan, si loo gaaro saldhigyada kooban ee gabaadka u ah Daacish.
Maalmo kahor, ciidamada ayaa burburiyay keydkii ugu weynaa ee raashinka iyo saadka kale ee argagixisada Daacish ku lahayd Miraale, ciidamada ayaa helay hogga keydka ahaa oo laga sameeyay meel ay adag tahay in si fudud loo helo.
IDILNEWS