Madaxweynaha DFS, Xassan Shiikh Maxamuud ayaa waraaqaha aqoonsiga safiirnimo ka guddoomay Danjiraha Dowladda Ingariiska ee Soomaaliya Charles King.
Charles King oo bishii May soo gaaray Muqdisho, u gudbiyay Xassan Shiikh dhambaal uu ka sidday Dowladda Ingariiska, kaas oo ku wajahan marxalada uu dalku marayo iyo xaalada cakiran ee siyaasadda dalka.
Villa Somalia ayaa qoraal ay baahisay ku sheegtay in Madaxweyne Xassan Shiikh iyo Charles King, ay isla soo qaadeen Horumarinta iskaashiga Amniga iyo dhaqaalaha ee Soomaaliya iyo Ingariiska.
“Madaxweynaha jamhuuriyadda iyo Safiirka ayaa ka wada hadlay xoojinta xiriirka saaxiibtinimo ee labada dal, horumarinta iskaashiga dhinacyada dhaqaalaha, adeegyada bulshada iyo amniga.”
Dowladda Ingariiska ayaa gacanta ku haysa gal Arrimaha Soomaaliya, waxaana magacaabida safiirka cusub oo kasoo shaqeeyay muddo dheer Wasaaradda Arrimaha UK – loo arkaa mid wax ka bedeli karta ismari waaga siyaasadda Soomaaliya, isagoo ku biiri doona xubnaha Wakiillada caalamiga ah ee dadaalka ugu jira in Xassan Shiikh laga badbaadiyo Dowlad dhiska Soomaaliya.
IDILNEWS