In kabadan 50 xubnood oo katirsan argagixisada Daacish ayaa lagu dilay dagaallo u dhexeeyay ciidamada Puntland iyo maleeshiyaadka firxadka ah ee kooxda argagixisada ah ee Daacish, kuwaas 48 saac ee u dambeysay ka socday buuraleyda Cal-miskaad ee gobalka Bari.
Howlgallada oo intooda badan ka dhacay Toggaga Miiraale iyo Baallade, waxaana ciidamada Puntland oo taageero ka helaya diyaaradaha dagaalka Puntland iyo kuwa Mareykanka ay gudaha u galeen aaggag ay gabaad ka dhigteen firxadka kooxda Daacish, ee laga saaray Miraale oo ahaa Taliska ugu weyn ee Daacish ku leedahay Geeska Africa.
Ciidamada Puntland ayaa dagaalka ku waayay labo Askari, halka saddex kalena uga dhaawacmeen.
Hub fara-badan, rasaas, diyaarado Drone iyo saanad ciidan, ayaa argagixisada Daacish looga qabtay howlgalka, sida ay inoo xaqiijiyeen saraakiisha hoggaaminaysa.
Madaxweynaha Puntland, Siciid Cabdullaahi Deni oo lagu waddo in maanta uu dib ugu soo laabto magaaladda Boosaaso – ayaa ku dhawaaqi doona in uu soo idlaaday Wajiga 3aad ee Howlgalka ciribtirka argagixisada Daacish, loona gudbi doono Wajiga afaraad.
Inta uu socday howlgalka Hillaac, ciidamada Puntland ayaa sifeeyay dhul ballaaran oo gaaraya ilaa 350-KM, kuwaas oo kooxda argagixisada ah ee Daacish ku lahayd joogis rasmi ah, kana geysan jireen falal argagixiso. Soo afjaridooda ayaa Puntland u soo hoyisay guul taariikhi ah iyo xulufo caalami ah oo ku qancay in Puntland ay tahay saaxiib rasmi ah, oo leh awood ciidan iyo mid siyaasadeed.
IDILNEWS