Koox Burcad-badeed ah oo haysatay Markabka MT Eureka ayaa isaga ka degay saacado kaddib markii ciidamada Badda Puntland ay hareereeyeen Markabka.
Kooxda Burcad-badeeda ahayd ayaa kaga degay Markabka deegaanka Hul-caanood ee gobolka Karkaar, iyagoo sidoo kale kala sii degay shaqaalihii saarnaa Markabka oo gaarayay ilaa 12, kuwaas oo ay ku wareejiyeen shacabka deegaanka.
Wararka ayaa intaa ku daraya in kooxda Burcad-badeeda ah ay qaadeen fal xun, waxaana ay dab qabad siiyeen qeyb Markabka kamid ah, si ay waxyeelo ugu geystaan, una caarisiiyaan.
Waa Markabkii saddexaad oo maalmo gudahood ay ciidamada Badda Puntland kala wareegaan Burcad-badeeda haysatay, saaka ciidamada Puntland ayaa howlgal qaatay saacado ku qabsaday Markabka Honour-25, iyagoo gacanta ku dhigay 22 kamid ah Burcad-badeedii haysatay.
Sidoo kale, Maalmo kahor Ciidamada Badda Puntland ayaa howlgal ay ka sameeyeen xeebaha gobolka Mudug ku qabsaday Markabka MTT-SIBU1, waxaana ay dileen mid kamid ah Burcad-badeedii haysatay, iyagoo maxaabiis ahaan u qabsaday in kabadan 20 Burcad-badeeda, kuwaas oo qaarkood dhaawac ahaayeen.
IDILNEWS