Warar dheeraad ah ayaa kasoo baxay howlgal ciidamada Badda Dowladda Puntland ay maanta kusoo furteen Markabka Honour-25, kaas oo tan iyo bishii April ay koox Burcad-badeed ah ku haysatay xeebaha Bari ee Puntland.
Ciidamada PMPF oo wata gaadiidka dagaalka ee Badda ayaa shalay hareereeyay Markabka Honour-25, kooxda oo dalbatay xalay in loo baneeyo jid, ayna ka degi doonaan ayaa aroornimadii saaka fulin waayay is afgaradkii lala gaaray oo ahaa in ay si nabad ah uga soo degaan, aysana jiri doonin cid dabagalaysa.
Ciidamada Badda Puntland ayaa intaa kaddib weeraray Markabka MT Honour-25, waxaan howlgal socday waqti kooban kaddib suuragashay in ay si buuxda ula wareegaan Markabka oo uu leeyahay ganacsade Reer Puntland ah, siddayna shidaal.
Saraakiisha hoggaaminaysay howlgalka ayaa u xaqiijiyay IdilNewa in ay gacanta ku dhigeen 22 kamid ah kooxdii Burcad-badeeda ahayd ee markabka haysatay, iyadoo ciidamadu qaarkood kasoo qabteen berriga oo ay ku sugnaayeen.
Khasaaraha ka dhashay howlgalka soo furashada Markabka Honour-25 .
Inta la xaqiijiyay 5 kamid ah shaqaalaha Markabka Honour-25 ayaa meydadkooda loogu tagay Markabka, kaddib markii ay dileen kooxda Burcad-badeeda ah ee haysatay Markabka.
Howlgalka ayaa yimid iyadoo maalmo kahor ay ciidamada Badda Puntland soo furteen Markabka MTT-SIBU1 oo lagu haystay xeebaha gobolka Mudug, waxaana howlgalka lagu qabtay maxaabiis, halka lagu dilay mid kamid ah kooxda Burcad-badeeda ahayd ee haysatay Markabka, qaar kalena la dhaawacay.
Madaxweynaha Puntland, Siciid Cabdulaahi Deni ayaa dhowaan ku dhawaaqay howlgal ka dhan ah Burcad-badeeda, isagoo sheegay in ay ula dagaalami doonaan si lamid ah kooxda argagaxisada ah ee Daacish, maadama ay halis ku yihiin Dowladnimada, ayna sumcad dilayaan mandiqada Puntland.
IDILNEWS