Xafiiska la taliyaha sharciga ee Aqalka Cad ee dalka Maraykanka ayaa sheegay Isniintii inaanu jirin wax ku saabsan ‘diiwaanka martida’ oo yaalla guriga madaxweyne Joe Biden ee ku yaalla gobolka uu ka soo jeedo ee Delaware. Arrintan ayaa daba socotay, ka dib markii uu mudane ka tirsan xisbiga Jamhuurigu uu codsaday in lala wadaago diiwaanka martida booqatay guriga Madaxweyne Joe Biden ee ku yaalla Delaware, halkaas oo laga helay waraaqo sir ahaa oo dawladdu lahayd.
Axaddii ayaa xafiiska James Comer oo ah guddoomiyaha cusub ee guddida kormeerka ee Aqalka Wakiillada Maraykanku, wuxuu ka codsaday Ron Klain oo ah madaxa shaqaalaha ee Aqalka Cad inuu macluumaad ka siiyo, ku saabsan baadhitaankii lagu sameeyey waraaqihii sirta ahaa ee laga helay xafiiska Biden ee ku yaalla magaalada Washington iyo weliba gurigiisa Delaware.
Waxyaabaha uu codsaday waxaa ku jiray, faahfaahin la xidhiidha dadkii booqday guriga tan iyo intii uu Joe Biden madaxweynaha noqday, oo ahayd January 2021.
“Sida madaxweyne kasta oo soo maray Maraykanka tobanaankii sano ee ugu dambeeyey ee taariikhda casriga ah, guriga gaarka ah ee madaxweynuhu waa kuwo isaga u gaar ah” sidaas waxaa yihi xafiiska la taliyaha sharciga ee Aqalka Cad.
Ciidanka ilaalada ee u xilsaaran ammaanka madaxweynaha ayaa sheegay, inkasta oo ay ilaaliyaan ammaanka guriga madaxweynaha, haddana inaanay si joogto ah u diiwaangelin, cidda baxaysa ama soo gelaysa.
“Si madaxbanaan uma ilaalino diiwaanka martida sababtoo ah waa guri gaar ah,” ayuu yidhi afhayeen u hadlay ciidanka ilaalada madaxweynaha.
Xubnaha cusub ee Jamhuuriga ee la wareegay aqalka wakiillada ayaa haatan dalbanaya macluumaad dheeri ah oo ku saabsan cidda heli kartay macluumaadka sirta ah ee laga helay guriga Biden, tan iyo markii xafiiska ka degey sannadkii 2017.
Biden ayaa sheegay inuu aad ula yaabay in waraaqo sir ah lala helay goobo isaga lala xidhiidhinayo.
Xigasho:-VOA