Xubno katirsan Hay’adda Nabad-sugida iyo Sirdoonka DFS ee NISA ayaa xabsiga la dhigay, kaddib markii lagu eedeeyay lunsashada lacag fara-badan oo ay kala baxeen Akoonada Hay’adda.
IdilNewa ayaa ogaatay in xubnaha la xiray oo ah saddex, kana howlgalayay xafiiska Maaliyadda ee NISA lagu helay in ay dhaceen lacag gaaraysa 2.5 Milyan oo dollar.
Lacagta la dhacay ayaa isugu jirtay mushaaraad ay lahaayeen shaqaalaha iyo ciidamada Hay’adda ee jooga Muqdisho iyo gobollada kale ee Koonfurta Soomaaliya, kuwaas oo bilaha qaar laga jartay mushaaraadkooda iyo gunnooyinka ay lahaayeen, laguna shubtay akoono gaar ah.
Dhacdada ayaa ifbaxday dhowaan, kaddib markii lacag jarashadu saameysay saraakiil Hay’adda NISA ah, iyo howlwadeeno gudaha xarunta Muqdisho ka shaqeynayay.
Dhanka kale, NISA ayaa hadda wajahaysa dhaqaale la,aan xooggan, iyadoo inta badan shaqaalaha Hay’adda iyo Askarta dharcadda ah aysan qaadan mushaar bishan, taas oo keentay hoos u dhac soo wajahay Hay’adda oo culeysyo kale oo dheeraad ah wajahaysay bilihii lasoo dhaafay.
Dhammaan xaaladaha ka taagan NISA ayaa kusoo aadaya xilli Agaasimaha Hay’adda, Mahad Salad uu xaalad caafimaad u joogo dalka Jarmalka muddo, isku dhex yaaca Hay’adda ayaana saameyn ku yeeshay shaqada xafiisyada iyo kuwa banaanka ee NISA.
IDILNEWS