Maleeshiyaad ku dagaalamay labo maalin kahor magaalada Badhan ee gobolka Sanaag, ayaa bilaabay in ay isaga baxaan gudaha magaalada kaddib Amarkii kasoo baxay Dowladda Puntland.
Guddi ay Puntland u dirtay Badhan ayaa shalay u qabtay maleeshiyaad beeleedka dagaalamay, in kahor 8:00 subaxnimo ee axada maanta ah isaga baxaan gudaha magaalada, iyagoo sheegay in ciddii fulin wayday laga qaadi doono talaabo sharci ah.
Wasiiru-dowlaha Wasaaradda Amniga Puntland, Fu’aad Xanaano oo Shirka go’aanka Guddiga shalay ka hadlayay, ayaa sheegay in aan la aqbali doonin maleeshiyaad sita hub, aan sharci ahayn in ay dhex joogaan magaalada Badhan.
Dhacdadii dagaal beeleedka ee jimcihii ayuu ku tilmaamay mid nasiib darro ah, oo kasoo horjeeda dhaqanka iyo Diinta.
Badhan ayaa waxaa ka socda mashaariic horumarineed oo baaxad leh, dagaalkii jimcihii ayaa la xaqiijiyay in ay ka shaqeeyeen xubno katirsan maamulka waqtigiisu dhammaaday ee Xassan Shiikh, kuwaas oo doonayay in ay suurad xumeeyaan Badhan, lana duugo dadaallada Puntland ee ku wajahan Amniga iyo horumarinta deegaanka.
IDILNEWS