Heshiis ayaa laga maleeshiyaad hubaysan oo degnaa Xerada Ligle ee duleedka caasimadda Puntland ee Garoowe, kuwaas oo uu hoggaaminayay Jimcaale Jaamac Takar.
Dadaalo socday muddo labo bilood ah ayna garwadeen ka ahaayeen Guddi ka kooban haldoorka gobolka Nugaal, uuna hoggaan u ahaa Madaxweynihii hore ee Puntland Cabdiraxmaan Faroole. Guddiga ayaa wakiil ka ahaa Dowladda Puntland, si nabad loogu soo afmeero maleeshiyaadka oo horey uga tirsanaan jiray Ciidanka Dowladda Puntland, balse dib ka sheegay inay yihiin Ciidan Federal oo hoostagaan maamulka waqtigiisu dhammaaday ee Xassan Shiikh.
Idilnews ayaa ogaatay in heshiiska uu soo degdeggay kaddib markii jimcihii shalay, ay Dowladda Puntland kordhisay Ciidanka jooga kantaroollada Garoowe, lana qorsheeyay in haddii aan kahor sabtida la gaarin heshiis, aysana isku dhiibin Jimcaale iyo maleeshiyaadkiisa Guddiga gobolka Nugaal la weeraro xerada Ligle, si lamid ah xerada ilma Diyaano ee Gaalkacyo oo ay Dowladdu awood Ciidan kula wareegtay.
Qodobadda heshiiska ayaa waxaa kamid ah;
• In Dowladda Puntland si rasmi ah ula wareegto maleeshiyaadka, lana mariyo diiwaanka Ciidanka Puntland.
• In maleeshiyaadka lagu xareeyo dugsiyada tababarada ciidamada Puntland, loona sameeyo Tababar iyo dhaqancelin.
• In Dowladda Puntland soo magacowdo sarkaalka hoggaaminaya maleeshiyaadka, marka la mariyo dib u habeynta, ayna noqdaan Ciidan rasmi ah.
Jimcaale Jaamac Takar oo maleeshiyaadka hoggaaminayay muddo dheer ayaa xoguhu tilmaamayaan, in Guddiga gobolka Nugaal go’aamiyeen in loo diro caafimaad, lana amba-bixiyo, maadama uu ka cabanayo dhaqaale la,aan iyo in uu daymo badan ku galay maleeshiyaadka hubaysan.
IDILNEWS