Dowladda Mareykanka ayaa ku cadaadinaysa Madaxweynaha DFS, Xassan Shiikh Maxamuud in hoggaanka Ciidamada Xoogga dalka laga qaado Gen. Odawaa Yuusuf Raagge, kaddib guuldarooyinkii bilihii lasoo dhaafay soo gaaray ciidamada milateriga Soomaaliyeed.
Idilnews ayaa ogaatay in dhowaan ay kala hadleen Madaxweyne Xassan Shiikh, isbedel lagu sameeyo Taliska ciidamada xoogga dalka, xilkana laga qaado Odawaa Yuusuf, lana keeno hoggaan cusub oo leh aqoon ciidan iyo waayo aragnimo la xiriirta dagaalka argagixisada.
Gen. Odawaa ayaa lumiyay kalsoonida ciidamada qalabka sida iyo saaxiibada ka taageera Soomaaliya dib u dhiska ciidamada iyo la-dagaallanka argagixisada, oo Mareykanku ugu baaxad weyn yahay, kaddib markii bartamihii bishii April uu isaga baxay degmada Aadan Yabbaal, xilli ay weerar kusoo qaaday kooxda Al-Shabaab oo la wareegtay gacan ku haynta degmada, sidoo kalena, ku dishay saraakiil muhiim ah iyo askar katirsanaa ciidamada xoogga dalka.
Kulan dhexmaray 6 May, Taliyaha AFRICOM Gen. Michael E. Langley iyo Madaxweyne Xassan Shiikh oo ay wehliyaan Wasiirka Gaashaandhigga XFS iyo Gen. Odawaa, ayaa Langley si adag ugu dhaleeceeyay hoggaaminta Odawaa ee ciidamada, isagoo dhowr su’aalood hordhigay, sidda sababta keentay in muddo dheer uu ku sugnaado jiidaha hore ee Aadan Yabbaal iyo waxa keenay in uu isaga sii cararo kaddib weerarka Al-Shabaab?.
Odawaa ayaa hoggaaminta ciidamada dib loogu magacaabay November 2024, kaddib sannad iyo bilo uu ka maqnaa xafiiska oo uu Xassan Shiikh ka eryay June 2023, waxaana hoggamintiisu ay horseeday fashil dagaalka argagixisada iyo in ciidamada xoogga dalka lagala wareego deegaano muhiim ah oo ay ku jiraan goobo laga sugi jiray amniga magaaladda Muqdisho.
IDILNEWS